ԱԺ «Հայաստան» խմբակցության պատգամավոր Գեղամ Մանուկյանը  Գորիս-Կապան ռազմավարական ճանապարհի հետ կապված հարց է տվել նախկինում Գորիսի փոխհամայնքապետի պաշտոնը զբաղեցրած, այժմ «Ուժեղ Հայաստան» խմբակցության կողմից առաջադրված Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի թեկնածու Իրինա Յոլյանին։

Պատգամավորը հիշեցրեց, որ իշխանական պատգամավորներից մեկը վերջերս Գորիսը ներկայացրել էր որպես ծաղկուն քաղաք, սակայն այսօր, ըստ պատգամավորի, Գորիսից դուրս գալիս յուրաքանչյուր ոք բախվում է անվտանգային լուրջ արգելքների։

«Ամեն անգամ Գորիսից գնում ես, ոնց որ թևդ կտրած մարդ գնաս, որովհետև Գորիսից գնում ես ու հանդիպում ես էն պատին։ Զրկված ես այն բերկրանքից, որ Գորիսով անցնեիր ու հասնեիր մինչև Ստեփանակերտ։

Որպես այդ ժամանակ Գորիսի փոխհամայնքապետ՝ կպատմե՞ք 2020 թվականի դեկտեմբերին ո՞նց գաղտնագողի, առանց սահմանազատման, առանց սահմանագծման, GPS-ով կտրեցին Գորիս-Կապան ճանապարհը, որ ՔՊ պատգամավորները մի հատ լսեն, թե ոնց եղավ այդ ամեն ինչը»,- հարցրեց Մանուկյանը։

Իրինա Յոլյանն ասաց, թե ճանապարհի հանձնումն աղետալի հետևանքներ է ունեցել Սյունիքի և մասնավորապես Գորիսի համար։

«Այդ ժամանակ էլ եմ բարձրաձայնել, հատկապես Գորիս-Կապան ճանապարհի փակվելու ժամանակ, երբ ադրբեջանական առաջին հենակետը հայտնվեց։ Ես ներկայացրել եմ 1964 թվականի Խորհրդային Հայաստանի Մինիստրների խորհրդի որոշումը և կադաստրի փաստաթուղթը, որով կառուցվել էր այդ ճանապարհը։ Դա այն իրավական հիմքն էր, որով պետք է բանակցեին և ամեն ինչ անեին, որ ճանապարհը բաց մնար։ Բայց Գորիսն իզոլացվեց․ փակվեց Ստեփանակերտ-Գորիս ճանապարհը, փակվեց Գորիս-Կապանը, իսկ միջպետական ճանապարհն այժմ շրջանցում է Գորիսը։ Գորիսին հատուկ կարգավիճակ է պետք, որպեսզի սյունեցիներն իրենց թիկունքն ամուր զգան»,- ասաց ընդդիմադիր պատգամավորը։

Մանրամասները՝ տեսանյութում։
Անի Թամրազյան