11.10.2026 | 09:46
Մեսին ու Սուարեսը երկուական գոլ են խփել. ՏԵՍԱՆՅՈՒԹ
Ուկրաինական ԱԹՍ-ների հարձակման հետևանքով հրդեհվել է Տամբովի մարզի Wildberries-ի պահեստը․ Լիպեցկում 2 մարդ է զոհվել
Քաղաքականություն
26.08.2026 | 10:23
ՌԴ Լիպեցկի շրջանում ուկրաինական անօդաչու թռչող սարքերի հարձակման հետևանքով մասնավոր տուն է հրդեհվել, որի հետևանքով երկու մարդ է զոհվել։ Այս մասին հայտնել է Լիպեցկի մարզի նահանգապետ Իգոր Արտամոնովը, փոխանցում է Meduza-ն։
Նրա տեղեկացմամբ՝ զոհերը տղամարդ և 14-ամյա դեռահաս են։ Երկու կին վիրավորվել և հոսպիտալացվել է։
Բացի այդ, օգոստոսի լույս 26-ի գիշերը ուկրաինական անօդաչու թռչող սարքերը հարձակվել են Տամբովի մարզի Կոտովսկ քաղաքում գտնվող Wildberries-ի պահեստի վրա: Նահանգապետ Եվգենի Պերվիշովի խոսքով՝ հարձակման հետևանքով հրդեհ է բռնկվել, որը տարածվել է ավելի քան 100,000 քառակուսի մետր տարածքի վրա: Աշխատակիցները տարհանվել են, մեկ մարդ վիրավորվել է:
RWB-ի մամուլի ծառայությունը հաստատել է լոգիստիկ օբյեկտի վրա հարձակումը և նշել, որ այնտեղ բեռների նոր փոխադրումներ չեն իրականացվում։ Կոտովսկում գտնվող պահեստը Wildberries-ի ինը օբյեկտներից մեկն էր, որը հարձակման ենթարկվեց դեռևս հուլիսի կեսերին, երբ Ուկրաինան սկսեց թիրախավորել դրանք։
Կոտովսկի քաղաքապետ Ալեքսեյ Պլախոտնիկովը կոչ է արել բնակիչներին կրճատել «քաղաքում ակտիվ տեղաշարժը» առաջիկա երկու օրերի ընթացքում և փակ պահել պատուհանները՝ հրդեհի, ուժեղ ծխի և մառախուղի պատճառով։
Ուկրաինական մոնիթորինգային ալիքները հաղորդում են, որ գիշերային հարձակումներից հետո Նիժնի Նովգորոդի մարզի Կստովո քաղաքում գտնվող «Լուկօյլ-Նիժեգորոդնեֆտեօրգսինթեզ» նավթավերամշակման գործարանը նույնպես հրդեհվել է: Տարածաշրջանային իշխանությունները դեռևս չեն հաղորդել հարձակման մասին:
Ռուսաստանի ՊՆ-ն հայտնել է Բելգորոդի, Բրյանսկի, Կուրսկի, Օրյոլի, Կալուգայի, Տուլայի, Լիպեցկի, Վորոնեժի, Տամբովի, Ռյազանի, Նիժնի Նովգորոդի, Վոլգոգրադի, Ռոստովի մարզերի, Մոսկվայի մարզի, Կրասնոդարի երկրամասի և բռնակցված Ղրիմի վրա ուկրաինական 426 ԱԹՍ-ների խոցման մասին։
Թարգմանությունը՝ Էմմա Չոբանյանի
