Ուկրաինան Patriot-ների համար սահմանափակ թվով հրթիռներ է ստացել․ Զելենսկի

Ուկրաինայի դաշնակիցների գագաթնաժողովների արդյունքներով երկիրը Patriot համակարգերի համար նախատեսված սահմանափակ թվով հրթիռներ է ստացել։ Այս մասին հայտարարել է Ուկրաինայի նախագահ Վլադիմիր Զելենսկին Կիևում Էստոնիայի նախագահ Ալար Կարիսի հետ համատեղ մամուլի ասուլիսի ժամանակ, գրում է BBC-ի ռուսական ծառայությունը։

«Patriot-ի համար նախատեսված հրթիռների որոշ քանակություն է հասել։ Թե որքան՝ չեմ կարող ասել, բայց քիչ է։ Ավելի շատ է պետք։ Մենք ստացել ենք, չեմ ասի, թե որ երկրից՝ մի քանի [ֆրանսիական] Crotale հակաօդային պաշտպանության համակարգերի և դրանց համար նախատեսված հրթիռների փոխանցման հաստատում: Մենք նաև ստացել ենք [ամերիկյան] AIM հրթիռներ: Դրանք մեզ համար շատ կարևոր հրթիռներ են. մենք դրանք օգտագործում ենք թշնամու հրթիռները խոցելու համար»,- Զելենսկիի խոսքերն է մեջբերում «Ինտերֆաքս Ուկրաինա»-ն։

Նախօրեին Մեծ Բրիտանիայի վարչապետ Էնդի Բըրնհեմը Bloomberg-ին ասել էր, որ սեպտեմբերին ԱՄՆ կատարած այցի ժամանակ կհամոզի նախագահ Դոնալդ Թրամփին՝ մինչև ձմեռ Ուկրաինային Patriot-ի համար  զինամթերքի հասանելիություն տրամադրել։

Երկուշաբթի Կիևում «կամավորների կոալիցիայի» գագաթնաժողովում ելույթ ունենալով՝ Զելենսկին ասել էր, որ Ուկրաինային անհրաժեշտ է առնվազն 300 որսացող հրթիռ՝ ձմռանը դիմակայելու համար, և կոչ էր արել դաշնակիցներին մատակարարել հակաօդային պաշտպանության փաթեթը՝ նախքան Ռուսաստանը կվերսկսի հարվածները երկրի էներգետիկ ենթակառուցվածքներին։