Զելենսկիի գրասենյակի ղեկավարի նախկին տեղակալը կալանավորվել է

Ուկրաինայի նախագահի  գրասենյակի ղեկավարի նախկին տեղակալ Իրինա Մուդրայան կալանավորվել է 60 օրով։ Երկրի Բարձրագույն հակակոռուպցիոն դատարանը խափանման միջոցն ընտրել է օգոստոսի 25-ին, Ուկրաինայի հակակոռուպցիոն  մարմինների կողմից անցկացվող հետաքննության շրջանակում։ Դատարանը Մուդրայային տվել է 20 միլիոն գրիվնայի (մոտավորապես 384,000 եվրո) չափով գրավի վճարման հնարավորություն, գրում է DW-ի ռուսական ծառայությունը։

Մուդրայան հայտարարել է, որ կփորձի գրավի գումարը հավաքել սեփական միջոցներով, ինչպես նաև ծանոթների ու ընկերների օգնությամբ։

«Ես շատ ընկերներ և բազմաթիվ կապեր ունեմ։ Հիշեցնեմ, թե քանի տարեկան եմ։ Այս ընթացքում բավականաչափ կապեր եմ ձեռք բերել»,- ասել է նա։

Դատարանի կողմից կալանավորման որոշումը հրապարակելուց հետո Մուդրայային դատարանի դահլիճից դուրս են բերել ուղեկցությամբ։

Ավելի վաղ Մասնագիտացված հակակոռուպցիոն դատախազության դատախազը հայտարարել էր, որ Իրինա Մուդրայան կարող է ունենալ ավելի քան 250 միլիոն գրիվնա արժեքով ակտիվներ։ Նա խնդրել էր որպես կալանքին այլընտրանք սահմանել 150 միլիոն գրիվնա գրավը։ Մուդրայայի փաստաբանը գրավի այդ չափն անվանել էր անհամաչափ մեծ գումար։ Նա նաև հայտարարել էր, որ ներկայացված կասկածն անհիմն է, և խնդրել էր մերժել խափանման միջոցի կիրառումը։

Իրինա Մուդրայան օգոստոսի 19-ին Ուկրաինայի նախագահ Վլադիմիր Զելենսկիի հրամանագրով ազատվել է Ուկրաինայի նախագահի գրասենյակի ղեկավարի տեղակալի պաշտոնից։ Նույն օրը ավելի վաղ հայտնի էր դարձել, որ Ուկրաինայի Ազգային հակակոռուպցիոն բյուրոն և Մասնագիտացված հակակոռուպցիոն դատախազությունը խուզարկություններ են իրականացնում բարձրաստիճան պաշտոնյաների մոտ։

Իրավապահ կառույցները հայտարարել էին «հանցավոր կազմակերպության բացահայտման հատուկ գործողության» մասին։ Ըստ նրանց՝ կազմակերպությունը գործել է գործող և նախկին պատգամավորների ղեկավարությամբ՝ Ուկրաինայի նախագահի գրասենյակի բարձրաստիճան աշխատակիցների մասնակցությամբ։

Ուկրաինական ԶԼՄ-ներն ու քաղաքական գործիչները հայտնել էին, որ խուզարկություններ, ի թիվս այլոց, իրականացվում են նաև Իրինա Մուդրայայի մոտ։ Հետաքննության շրջանակում հիշատակվում է նաև Գերագույն ռադայի նախկին պատգամավոր Մաքսիմ Միկիտասի անունը։

Հետաքննությունը կապված է «Sens Bank»-ի և կոռուպցիայի մեջ կասկածվող Ուկրաինայի էներգետիկայի և արդարադատության նախկին նախարար Գերման Գալուշչենկոյի համար գրավ վճարելու հետ։

Թարգմանությունը՝ Էմմա Չոբանյանի