Խորհրդային լրտես Գլյուքսմանի թոռն առաջադրվել է Ֆրանսիայի նախագահի պաշտոնում

46-ամյա Գլյուքսմանը նախագահական ընտրություններին մասնակցելու որոշման մասին հայտարարել է TF1 հեռուստաալիքի եթերում։

«Ես առաջադրվում եմ, քանի որ ուզում եմ Ֆրանսիան ոտքի կանգնեցնել։ Մեր սրտերը կոտրվում են, երբ տեսնում ենք, թե ինչի է վերածվում մեր երկիրը։ Մենք կարող ենք հաղթել այս ընտրություններում և փոխել ֆրանսիացիների կյանքը»,- ասել է նա։

Չափավոր ձախերի միասնական թեկնածու դառնալու համար Գլյուքսմանը ծրագրում է մասնակցել Սոցիալիստական կուսակցության նախնական ընտրություններին։ Այնտեղ նա, հավանաբար, կմրցակցի մի շարք հայտնի ֆրանսիացի քաղաքական գործիչների հետ։ Հնարավոր թեկնածուների թվում են պատգամավոր Ֆիլիպ Բրյունը, շրջակա միջավայրի նախկին նախարար Սեգոլեն Ռուայալը, նախկին նախագահ Ֆրանսուա Օլանդը և սոցիալիստների առաջնորդ Օլիվիե Ֆորը։

2024 թվականի խորհրդարանական ընտրություններում Գլյուքսմանը և մյուս ձախերը միավորվել էին Ժան-Լյուկ Մելանշոնի արմատական ձախակողմյան «Չնվաճված Ֆրանսիա» կուսակցության հետ՝ ստեղծելով «Նոր ժողովրդական ճակատ» դաշինքը, որը գրավել էր առաջին տեղը։ Այս անգամ նման դաշինք չի սպասվում. Մելանշոնը հրաժարվել է մասնակցել սոցիալիստների փրայմերիզին և մտադիր է ինքնուրույն առաջադրվել։ Գլյուքսմանը, իր հերթին, խոստացել է, որ «այլևս պայմանավորվածություններ չեն լինի Մելանշոնի հետ»։

Ձախ կենտրոնամետ Բնապահպաններ կուսակցությունը, ըստ Bloomberg-ի, ներկայում բանակցություններ է վարում երկու ճամբարների հետ։ Այսպիսով, ձախակողմյան ընտրազանգվածը Ֆրանսիայում շարունակում է մնալ ծայրահեղ պառակտված։

Հարցումների համաձայն՝ առաջին փուլում առայժմ ֆավորիտը շարունակում է մնալ Մարին Լը Պենը («Ազգային միավորում»)։ Ըստ Reuters-ի՝ նրա մրցակիցներից ոչ մեկն առաջին փուլում անգամ 19% ձայն չի հավաքում, մինչդեռ Ելիսեյան պալատի ղեկավարի պաշտոնի համար արդեն չորրորդ անգամ պայքարող Լը Պենի վարկանիշը կազմում է շուրջ 36%։ Հարցումները նաև ցույց են տալիս, որ մի շարք սցենարների դեպքում նա կհաղթի երկրորդ փուլում։

Ըստ Euronews-ի՝ Գլյուքսմանը կարող է ակնկալել ձայների 10-12%-ը։ Հունիսյան OpinionWay-ի հարցումն ավելի բարձր արդյունք է ցույց տվել․ Գլյուքսմանը հավաքել է 14%՝ նույնքան, որքան նախկին վարչապետ Գաբրիել Աթալը, և փոքր-ինչ առաջ է եղել Մելանշոնից, որի ցուցանիշը 13% է եղել։ Լը Պենը ստացել է 35%։

Գլյուքսմանը կարող է նաև կողմնորոշվել 2024 թվականի Եվրախորհրդարանի ընտրություններում իր արձանագրած արդյունքով․ նրա գլխավորած սոցիալիստների և «Հանրային տարածք» կուսակցության միասնական ցուցակը ստացել էր ձայների 13,8%-ը։

Գլյուքսմանը հայտնի է որպես Ուկրաինայի հետևողական կողմնակից։ 2009-ից 2013 թվականներին նա եղել է Վրաստանի այն ժամանակվա նախագահ Միխեիլ Սաակաշվիլիի խորհրդականը։ Նա ֆրանսիացի փիլիսոփա Անդրե Գլյուքսմանի որդին է։ The Telegraph-ը նաև հաղորդում է, որ նրա պապը՝ Ռուբին Գլյուքսմանը, խորհրդային հետախուզության աշխատակից է եղել։

Ֆրանսիայի նախագահական ընտրությունների առաջին փուլը նախատեսված է 2027 թվականի ապրիլի 18-ին, իսկ երկրորդ փուլը՝ մայիսի 2-ին։