Պուտինը թույլատրել է պետությանը փոխանցել «կարևորագույն ենթակառուցվածքային օբյեկտները», որոնց սեփականատերերը չեն կարողանում դրանք պաշտպանել ԱԹՍ-ներից

ՌԴ նախագահ Վլադիմիր Պուտինը հրամանագիր է ստորագրել, որով թույլատրվում է ժամանակավոր կառավարում մտցնել կարևորագույն ենթակառուցվածքային օբյեկտներում, որոնց սեփականատերերը չեն կարողանում դրանք պաշտպանել անվտանգության սպառնալիքներից, այդ թվում՝ ուկրաինական անօդաչու թռչող սարքերի հարձակումներից, գրում է Meduza-ն։

Փաստաթղթի համաձայն՝ «կարևորագույն ենթակառուցվածքային օբյեկտները» սահմանվում են որպես վառելիքաէներգետիկ համալիրի, էներգետիկայի, արդյունաբերության, կապի, կոմունալ ծառայությունների, տրանսպորտային և լոգիստիկ ենթակառուցվածքների օբյեկտներ, ինչպես նաև «այլ օբյեկտներ, որոնք հատկապես կարևոր են Ռուսաստանի Դաշնության անվտանգության և տնտեսական կայունության ապահովման համար»։

Արտաքին կառավարում կկիրառվի, եթե այս օբյեկտների սեփականատերերը չեն ձեռնարկել անվտանգության միջոցառումներ, խախտել են կառավարության անվտանգության պահանջները, սպառնալիք են ստեղծել դրանց անվտանգությանը և բնականոն գործունեությանը, այդ թվում՝ անօդաչու թռչող սարքերի հարձակումները կանխելու անարդյունավետ միջոցառումների միջոցով, չեն վերականգնել այդ օբյեկտները հարձակումներից հետո։

Հրամանագրի համաձայն՝ ժամանակավոր կառավարիչը կլինի «Ռոսիմուշչեստվո»-ն կամ կառավարության կողմից նշանակված «այլ կազմակերպություն»։ Իշխանությունները կկարողանան սեփականատիրոջ անշարժ գույքի, արժեթղթերի և ակտիվների նկատմամբ իրավունքները փոխանցել ժամանակավոր կառավարչին։ Այս գույքի պահպանումը կֆինանսավորվի դրա օգտագործումից ստացված եկամուտներով։

Հրամանագիրն ուժի մեջ է մտել։

Հավելենք, որ Պուտինի նոր հրամանագիրը հրապարակվել է ուկրաինական անօդաչու թռչող սարքերի կողմից ռուսական նավթարդյունաբերության օբյեկտների, ինչպես նաև Wildberries-ի և Ozon-ի լոգիստիկ կենտրոնների դեմ պարբերաբար իրականացվող հարվածների ֆոնին։

Թարգմանությունը՝ Էմմա Չոբանյանի