Գիտեմ, որ անգլերենի և ռուսերենի իջևանյան բարբառներին փայլուն տիրապետում եք, հարցս հայերեն էր․ Էդգար Ղազարյան․ ՏԵՍԱՆՅՈՒԹ

ԱԺ-ում Կառավարության 2026-2031 թթ․-ի ծրագրի քննարկման ընթացքում վարչապետ Նիկոլ Փաշինյանը և ընդդիմադիր պատգամավոր Էդգար Ղազարյանը քննարկում ունեցան Հայաստանի Հանրապետությունը «երրորդ» և «չորրորդ» հանրապետություն անվանելու շուրջ։

Ղազարյանը հայտարարեց, որ Կառավարության ներկայացրած ծրագիրն ու վարչապետի հնչեցրած մտքերը, իր գնահատմամբ, «երկրի անվտանգության, ինքնիշխանության, տարածքային ամբողջականության և սահմանադրական կարգի տապալման մի հատ համալիր ամբողջություն են»։

Փաշինյանը նշեց, որ Կառավարության քաղաքական խոսույթի նպատակն է ապահովել պետության հարատևությունը, իսկ դրա իրավունքը, Փաշինյանի պնդմամբ,  ստացել են նախընտրական ծրագրով և ժողովրդից ստացած մանդատով։

Ղազարյանն արձագանքեց հեգնանքով՝ ասելով, որ վարչապետը, թեև «ֆրանկաֆոն է» և տիրապետում է «անգլերենի և ռուսերենի իջևանյան բարբառներին», իր հարցը հայերեն էր։ Պատգամավորը կրկին պահանջեց պատասխանել, թե օրենքի որ դրույթներով է Փաշինյանին իրավունք տրված «համարակալելու» պետությունը։

Նա ընդգծեց, որ պետությունը համար չունի, այլ ունի անուն՝ Հայաստանի Հանրապետություն, որը, ըստ Ղազարյանի, ստացել է 1990 թվականի օգոստոսի 23-ի Անկախության հռչակագրով։ Պատգամավորը նաև վարչապետին մեղադրել է պետական խորհրդանիշների տոնի առթիվ ուղերձ հղելու համարձակություն չունենալու մեջ։

Փաշինյանն էլ հակադարձեց, որ Սահմանադրությունն իրեն՝ որպես վարչապետի, լիազորում է սահմանել կառավարության գործունեության հիմնական ուղղությունները։ Նա իր հերթին հարց ուղղեց Ղազարյանին՝ նախկինում «երրորդ հանրապետություն» եզրույթը կիրառելու համար Սահմանադրության ո՞ր դրույթն էր հիմք հանդիսացել։

Մանրամասները՝ տեսանյութում։

Անի Թամրազյան