Հնարավոր չէ ժխտել, որ Ադրբեջանը ակտիվ արծարծում և գործիքայնացնում է Սահմանադրության թեման․ Փաշինյան․ ՏԵՍԱՆՅՈՒԹ

«Հնարավոր չէ ժխտել, որ Ադրբեջանը շատ ակտիվ արծարծում և նույնիսկ գործիքայնացնում է սահմանադրական բարեփոխումների թեման, և սա հանրահայտ փաստ է»,- Ազգային ժողովում ունեցած ելույթում հայտարարեց վարչապետ Նիկոլ Փաշինյանը՝ միաժամանակ հակադարձելով ընդդիմության այն պնդումներին, թե նոր Սահմանադրությունը պարտադրված է Բաքվի կողմից։

«Նոր Սահմանադրության ընդունման օրակարգը մաքուր հայաստանյան օրակարգ է, ոչ միայն այն պատճառով, որ դեռևս 2020 թվականի փետրվարին մենք որդեգրել ենք այդ օրակարգը և հայտարարել դրա մասին, այլև հիմա ՀՀ քաղաքացիները, քվեարկելով «Քաղաքացիական պայմանագիր» կուսակցության օգտին, քվեարկել են նաև այդ օրակարգի օգտին»,- ընդգծեց նա։

Փաշինյանը զուգահեռ անցկացրեց 1994 թվականից ի վեր ընթացած բանակցությունների հետ՝ նշելով, որ յոթ շրջանների վերադարձի թեման ևս արծարծում էր Ադրբեջանը, սակայն նախկին իշխանությունները 24 տարի շարունակ բանակցել են այդ օրակարգով։

«Բա ինչո՞ւ են բանակցել, բա ինչո՞ւ են 24 տարի Հայաստանը պահել ադրբեջանական օրակարգի մեջ։ Մի՞թե այն պատճառով, որ ղեկավարվել են Ադրբեջանի կողմից կամ եղել են Ադրբեջանի ներկայացուցիչը, մանավանդ որ նրանց մի մասը ծնվել և մեծացել է Ադրբեջանում։ Այս բնորոշումները անում եմ ցույց տալու համար, թե մեր մի շարք ընդդիմադիրների տրամաբանությունը ինչ անհեթեթ հետևությունների կարող է հանգեցնել»,- ասաց Փաշինյանը։

Վարչապետը հայտնեց, որ նոր Սահմանադրության տեքստը կհրապարակվի առաջիկա ամիսներին, և դրանում չի լինելու հղում 1990 թվականի Անկախության հռչակագրին։

Մանարամասները՝ տեսանյութում։

Անի Թամրազյան