17.08.2026 | 20:12
Էջմիածին-Երևան երթուղայինում ծեծկռտուք է տեղի ունեցել․ վարորդն ու կարգավարը ձերբակալվել են
«Յաբլոկո»-ի փոխնախագահ Լև Շլոսբերգը 11 տարվա ազատազրկման է դատապարտվել ռազմական «կեղծիքների» և ՌԴ բանակը «վարկաբեկելու» գործով
17.08.2026 | 18:06
ՌԴ Պսկովի քաղաքային դատարանը «Յաբլոկո» կուսակցության փոխնախագահ Լև Շլոսբերգին դատապարտել է 11 տարի և 1 ամիս ժամկետով ազատազրկման՝ ռազմական «կեղծիքներ» տարածելու և ռուսական բանակը «վարկաբեկելու» հոդվածներով։ Մեղադրող կողմը պահանջել էր 12 տարի և մեկ ամիս ժամկետով ազատազրկում, գրում է Current time-ը։
Ռազմական «կեղծիքներ» տարածելու քրեական գործը հարուցվել է Эхо Москвы-ի կողմից բրիտանական Daily Mirror-ի շապիկի վերահրապարակման պատճառով, որտեղ պատկերված էր արյունոտված կին և Ռուսաստանի նախագահ Վլադիմիր Պուտինը՝ «Նրա արյունը… Նրա ձեռքերը» մակագրությամբ։ Շլոսբերգի Տելեգրամի ալիքից հրապարակումը ջնջվել է 2025 թվականի դեկտեմբերին, իսկ Эхо Москвы-ի տելեգրամյան ալիքը դադարեցրել է գործունեությունը 2022 թվականին՝ խմբագրությունը լուծարելու որոշումից հետո։
Շլոսբերգը հայտարարել է, որ հետաքննությունը չի կարողացել ապացուցել, որ ինքն է հրապարակման հեղինակը։ Նրա պաշտպանները դատարանի ուշադրությունն են հրավիրել այն հանգամանքի վրա, որ նա պաստառը վերահրապարակել է՝ նախքան ՌԴ Քրեական օրենսգրքում ռուսական բանակի մասին «կեղծիքների» վերաբերյալ հոդվածի ներմուծումը։
Ռուսական բանակը «վարկաբեկելու» համար մեղադրանք Շլոսբերգին առաջադրվել է պատմաբան Յուրի Պիվովարովի հետ բանավեճի պատճառով։ Մեկ ամիս առաջ Շլոսբերգը դատապարտվել էր 420 ժամ հասարակական աշխատանքի՝ «օտարերկրյա գործակալի» իր պարտականությունները չկատարելու համար։
