Գործընկերս ասաց` Սիսակ ջան, նստի, հետ գնացի. Սիսակ Գաբրիելյանը` Էդգար Ղազարյանի ուղղությամբ գնալու մասին. ՏԵՍԱՆՅՈՒԹ

Ազգային ժողովում Factor TV-ի հետ զրույցում «Քաղաքացիական պայմանագիր» խմբակցության պատգամավոր Սիսակ Գաբրիելյանն անդրադարձել է դրվագին, երբ Էդգար Ղազարյանի ելույթից հետո ինքը քայլել էր նրա ուղղությամբ:

Պատասխանելով հարցին, թե արդյոք պատրաստվում էր հարվածել Ղազարյանին, Գաբրիելյանը արձագանքեց. «Միանշանակ՝ չէ։ Իմ գործընկերները ավելի մոտ էին նստած, ինչ-որ բան էին խոսում, փորձում էի մոտենալ։ Գործընկերներիցս մեկն ասաց՝ «Սիսակ ջան, նստի», գնացի նստեցի։ Երբ նիստը նախագահողը սկսեց խոսել, որպես հարգանքի նշան նաև նստեցի իմ տեղում»։

Խոսելով խորհրդարանական էթիկայի և վարքագծի կանոնների մասին՝ Գաբրիելյանը նշեց, որ իշխող մեծամասնությունը փորձում է ձևավորել քաղաքական նոր մշակույթ։

«Մենք, Ազգային ժողովի փոխնախագահ Ռուբեն Ռուբինյանի առաջարկությամբ, հայտարարել ենք, և մյուս խմբակցություններն ընդունել են, որ այն, ինչ եղել է անցյալում, վնասել է ԱԺ հեղինակությանը, եկեք գծեր սահմանենք և դրանից այն կողմ չանցնենք, և դա 99․9%-ով պահվում է»,- ասաց Գաբրիելյանը։

Հիշեցնենք, որ ԱԺ «Ուժեղ Հայաստան» խմբակցության պատգամավոր Էդգար Ղազարյանի այսօրվա ելույթից հետո ԱԺ-ում իրավիճակը լարվել էր։ Պատգամավորների միջև բանավեճը շարունակվել է նաև նիստերի դահլիճից դուրս՝ խորհրդարանի միջանցքում։

Ելույթի ընթացքում Ղազարյանը նշել էր, որ իր քեռու անվանակից թոռը՝ Աղաջան Ջանոյանը, ԵՊԲՀ-ի առաջին կուրսի ուսանող էր և զոհվել է 44-օրյա պատերազմում։

«Մենք լավ կլինեինք, եթե Աղաջան Ջանոյանը դառնար իր երազանքի ռազմական բժիշկը, փրկեր մեր զինվորների կյանքը, որը դուք սրիկայաբար փորձում եք շահարկել այստեղ»,- ասել էր Ղազարյանը։

«Ուժեղ Հայաստան» խմբակցության ղեկավար Նարեկ Կարապետյանը հայտնել էր, որ Ղազարյանի խոսույթի վերաբերյալ խմբակցությունը նիստ է անցկացրել՝ առանց մանրամանսեր ներկայացնելու։ Ավելի ուշ Ղազարայանը դուրս էր եկել ԱԺ-ից՝ առանց հարցերի պատասխանելու։

Մանրամասները՝ տեսանյութում։

Նարեկ Կիրակոսյան