Հայոց ցեղասպանությունը չպետք է դարձնել որևէ տեսակի բանակցության առարկա․ Սարգիս Խանդանյան. ՏԵՍԱՆՅՈՒԹ

Ազգային ժողովի արտաքին հարաբերությունների մշտական հանձնաժողովի նախագահի թեկնածու Սարգիս Խանդանյանը հայտարարել է, որ Հայաստանի իշխանություններն այլևս առաջնահերթություն չեն համարում Հայոց ցեղասպանության միջազգային ճանաչման հարցը:

Խանդանյանը հստակեցրել է, որ գործընթացն ընթանում է առանց նախապայմանների: Նա հերքել է այն լուրերը, թե Թուրքիան պահանջներ է ներկայացրել Ցեղասպանության ճանաչման հարցից հրաժարվելու կամ Արարատ լեռը պետական խորհրդանիշներից հանելու վերաբերյալ:

«Բանակցությունների որևէ փուլում նման պահանջ, նման նույնիսկ ակնարկ Թուրքիայի ներկայացուցիչների կողմից երբևէ չի եղել»,- շեշտել է նա:
Խանդանյանի պնդմամբ՝ Ցեղասպանության հարցն արտաքին քաղաքական օրակարգ բերելը եղել է նախկին իշխանությունների սխալը: Նրա խոսքով՝ այդ հարցը չպետք է լինի առաջնահերթություն նաև ապագայում:
«Հայաստանի կառավարությունը, մասնավորապես Ռոբերտ Քոչարյանի տարիներին, երբ որ այդ հարցը բերել է և դարձրել ազգային արտաքին քաղաքական առաջնահերթություն, մեծագույն սխալ է գործել»,- հայտարարել է պատգամավորը:

Որպես հիմնավորում՝ Խանդանյանը նշել է, որ Ցեղասպանության ճանաչման հարցը տարբեր երկրների կողմից օգտագործվել է որպես քաղաքական գործիք: Նա մատնանշել է այն պետություններին, որոնք ընդունելով Ցեղասպանությունը ճանաչող բանաձևեր, միևնույն ժամանակ ռազմական խոշոր պայմանագրեր են կնքել Ադրբեջանի հետ:

«Հայոց ցեղասպանությունը չպետք է դարձնել որևէ տեսակի բանակցության առարկա»,- եզրափակել է նա:

Մանրամասները՝ տեսանյութում։

Եվգենյա Համբարձումյան