Պուտինը «հայելային պատասխանով» է սպառնացել ԵՄ երկրների կողմից ռուսական նավերի կալանավորման դեպքում

Ռուսաստանի նախագահ Վլադիմիր Պուտինը «ծովահենություն և ավազակություն» է որակել եվրոպական երկրների կողմից ռուսական նավերի կալանավորումը։

«Եթե դա գործնականում իրականացվի, մենք ստիպված կլինենք հայելային պատասխան տալ»,- Խաղաղօվկիանոսյան նավատորմի զորավարժությունների ժամանակ ունեցած ելույթում հայտարարել է նա, գրում է BBC-ի ռուսական ծառայությունը։

Ընդ որում, ըստ Պուտինի, պարտադիր չէ, որ Ռուսաստանը «պատասխանի» նույն ջրերում, «այլ այնտեղ, որտեղ մենք ինքներս անհրաժեշտ և նպատակահարմար կհամարենք, այդ թվում՝ Խաղաղօվկիանոսյան նավատորմի պատասխանատվության գոտում»։

«Նման հրաման արդեն տրվել է Պաշտպանության նախարարությանը։ Գիտեմ, որ այն նաև փոխանցվել է Խաղաղօվկիանոսյան նավատորմի հրամանատարությանը, և ես կխնդրեի նրանց նույնպես ներկայացնել իրենց առաջարկներն այս խնդրի վերաբերյալ», – ասել է Պուտինը։

ԵՄ անդամ երկրներն ու Մեծ Բրիտանիան կալանավորում են ռուսական «ստվերային նավատորմի» նավերը՝ կեղծ դրոշների ներքո նավարկելու կասկածանքով։ Օրինակ՝ հունիսի վերջին Ֆրանսիան Սիցիլիայի ափերի մոտ կալանավորել է Deliver լցանավը, որը նավարկում էր Կամերունի դրոշի ներքո, սակայն դրա գրանցումն այդ երկրում չեղյալ էր հայտարարվել կալանավորումից մի քանի շաբաթ առաջ։

Միաժամանակ, Ռուսաստանի դեմ պատժամիջոցների 21-րդ փաթեթի շրջանակում Եվրամիությունը թույլատրել է միության անդամ երկրներին վաճառել ռուսական նավթը և նավթամթերքը, ինչպես նաև այլ բեռներ, որոնք կառգրավեն Ռուսաստանի «ստվերային նավատորմին» պատկանող նավերից: ԵՄ նոր կարգավորումները թույլ են տալիս նաև վաճառել նավերից առգրավված հացահատիկը: