ՌԴ-ում ձերբակալում են ռուս զինվորականների գերեզմանները լուսանկարողներին

Ռուսաստանում ավելացել են գերեզմանատներում շիրիմները լուսանկարող մարդկանց ցուցադրական ձերբակալությունների դեպքերը, հայտնել է «Մեդիազոնա»-ի խմբագիր Դմիտրի Տրեշչանինը։ Ըստ նրա՝ անվտանգության ուժերը մի քանի շրջանների բնակիչներին ստիպել են ներողություն խնդրել տեսախցիկի առջև, փոխանցում է Meduza-ն։

Լրագրողի խոսքով՝ «Մեդիազոնա»-ն վերջերս սկսել է մարդկանց գումար առաջարկել պատերազմում զոհված ռուսաստանցիների շիրիմների լուսանկարների համար: Տրեշչանինը նշում է, որ խաբեբաները հետաքրքրված են այս տվյալներով, որոնք մի քանի անգամ փորձել են լրատվականից գնել չհրապարակված տվյալների բազաներ:

Գերեզմանների լուսանկարները, ի թիվս այլ բաների, օգտագործվում են նաև հարազատներին խաբելու համար: Տրեշչանինը չի ներկայացրել այս սխեմայի մանրամասները: Այնուամենայնիվ, նա նշել է, որ եթե անձն իր հեռախոսում ունի լուսանկարներ և նամակագրություն լուսանկարը պահանջող անձի հետ, ԱԴԾ-ն կարող է նրան մեղադրել պետական դավաճանության մեջ:

Ընդ որում, աղբյուրի ներկայացմամբ, գործը կկազմվի այնպես, կարծես հանձնարարությունը ստացվել է ուկրաինական հատուկ ծառայություններից: Ավելին, նման առաջարկներ կարող են անել հենց անվտանգության ուժերը՝ հանցագործությունների բացահայտման մակարդակը բարձրացնելու համար:

Անցյալ շաբաթվա վերջին հայտնի դարձավ Յարոսլավլի բնակչի դեմ դավաճանության մեղադրանքով քրեական գործ հարուցելու մասին: Մեղադրող կողմի պնդմամբ՝ նա 2024 թվականի հոկտեմբերից համակարգված լուսանկարել և տեսանկարահանել է ռուս զինվորների գերեզմանները, ապա այդ նյութերն ուղարկել է Ուկրաինայի հետախուզական ծառայություններին։

Հրապարակման համաձայն՝ վերջին մեկ ամսվա ընթացքում Յարոսլավլի մարզային դատարանի կայքում պետական դավաճանության մասին առնվազն երկու գործ է հայտնվել։ Հունիսի վերջին նմանատիպ գործով ձերբակալվել են Տոմսկի մարզի մի քանի բնակիչներ։ Ձերբակալվածների հստակ թիվը չի հրապարակվում։

Mediazona-ն, BBC-ի ռուսական ծառայության հետ համատեղ, հաշվում է պատերազմում զոհված ռուսաստանցիների թիվը։ Պարբերականը շեշտում է, որ նախկինում կամավորներին խնդրել է ուղարկել ռուսական գերեզմանատներում գտնվող նոր շիրիմների լուսանկարներ, բայց հիմա ​​խստորեն խորհուրդ է տալիս նման բան չանել։