«Երիտասարդը հուժկու հարվածներ էր հասցնում հատկապես դեմքին». Գյումրիում սպանված կնոջ գործով ուսումնասիրվում են Վարդան Ղուկասյանի տան տեսախցիկները

Մի քանի օր է՝ Հայաստանի իրավապահ մարմինները որեւէ տեղեկություն չեն հայտնում, թե ո՞վ է դեկտեմբերի 2-ի լուսաբացին դաժան ծեծի ենթարկել Գյումրու բնակիչ Ջուլիետա Ղազարյանին: Վերջինը հիվանդանոցի ճանապարհին մահացել էր:

Իրավապահները շարունակում են լռել: Քիչ առաջ գլխավոր դատախազությունից մեր հարցին ի պատասխան փոխանցեցին, որ գործը գտնվում է նախաքննական փուլում, և ոչ մի մանրամասն չեն կարող հայտնել: Այս դեպքի հետ կապված ակտիվացել է նաև Հայաստանում Հայաստանում ՌԴ դեսպանատունը: Կառույցը հայտարարություն է տարածել և, ըստ էության, չի հերքել վարկածը, որ գյումրեցի կնոջը ծեծի ենթարկելու մեջ կասկածվում է ռուսական 102-րդ ռազմաբազայի զինծառայողը:

«Ուշադրություն դարձրեցինք Գյումրիում տեղակայված ռուսական 102-րդ ռազմակայանի զինծառայողի՝ Հայաստանի քաղաքացու սպանության մեջ մասնակցության վերաբերյալ, հայկական մի շարք ԶԼՄ-ում հայտնված հրապարակումներին: Տարակուսանքի զգացում է առաջացնում նման վերին աստիճանի ոչ մասնագիտական մոտեցումը տեղեկատվության հետ տարվող աշխատանքին, երբ ամբողջությամբ անտեսելով անմեղության կանխավարկածը՝ «ճչացող» վերնագրերի ներքո հրատարակվում են չստուգված և չհաստատված տվյալներ: Նման անպատասխանատու վարքագիծը, հատկապես ընտրությունների այս ոչ դյուրին շրջանում, ձեռնտու է այն ուժերին, որոնք ցանկանում են սեպ խրել Հայաստանի և Ռուսաստանի միջև առկա ռազմավարական և ավանդական բարեկամական հարաբերություններում»,- ասված է հայտարարության մեջ:

Սրան զուգահեռ՝ Գյումրու մեր աղբյուրներից տեղեկացանք, որ 102-րդ ռազմաբազան լքած զինվոր կա, ինչպես նաև զինծառայողներից մեկը ներգրավված է այս գործում որպես կասկածյալ: Մեր այս տեղեկությունների վերաբերյալ դատախազությունից կրկին փոխանցեցին, որ գործը գտնվում է նախաքննական փոլում, և ոչինչ չեն կարող ասել:

Տեղեկացանք նաև, որ այս գործին կցվել են ԱԺ պատգամավոր Վարդան Ղուկասյանի առանձնատունը հսկող տեսախցիկներից որոշ կադրեր: Իրավապահ համակարգի մեր աղբյուրների փոխանցմամբ՝ կադրերում երևում է, թե ինչպես է կինը հանգիստ քայլում, երբ նրան է մոտենում երիտասարդը: Նույն աղբյուրի տեղեկացմամբ՝ այդ կադրերում երևում է, թե ինչպես է երիտասարդը հուժկու հարվածներ հասցնում հատկապես կնոջ դեմքին:

Այս իրավիճակում անհասկանալի է մեր իշխանությունների լռությունը: Իշխող քաղաքական ուժը նախկինում քննադատել է ռազմաբազայի ծառայողների կողմից կատարված աղմկոտ քայլերը:

Հիշեցնենք, որ մահացածը Գյումրու Աճեմյան 26 հասցեի բնակիչ Ջուլիետա Ղուկասյանն է: Դեպքը տեղի է ունեցել դեկտեմբերի 2-ի լուսադեմին՝ ԱԺ պատգամավոր Վարդան Ղուկասյանի տան մոտակայքում, նա գնալիս է եղել իր կողմից մաքրվող տարածք՝ Տիգրան Մեծ փողոց:

Հայկ Վարդանյան