Ում հետ է Նիկոլ Փաշինյանը մեկնել Ղրղզստան

Վարչապետ Նիկոլ Փաշինյանի որոշմամբ՝ օգոստոսի 6-7-ը կառավարական պատվիրակություն է գործուղվել Ղրղզստանի Հանրապետություն՝ աշխատանքային այցով։

Որոշման համաձայն՝ պատվիրակությունը մեկնելու է Չոլպոն-Աթա։ Վարչապետի՝ գործուղման մեջ գտնվելու ժամանակահատվածում նրա պարտականությունների կատարումը դրվել է փոխվարչապետ Տիգրան Խաչատրյանի վրա։

Կառավարական պատվիրակությունը գլխավորում է վարչապետ Նիկոլ Փաշինյանը։ Դրա կազմում ընդգրկված են նաև փոխվարչապետ Մհեր Գրիգորյանը, արտաքին գործերի նախարարի տեղակալի ժամանակավոր պաշտոնակատար Մնացական Սաֆարյանը, Ղրղզստանում ՀՀ արտակարգ և լիազոր դեսպան Արմեն Ղևոնդյանը, էկոնոմիկայի նախարարի տեղակալի ժամանակավոր պաշտոնակատար Նարեկ Հովակիմյանը և Պետական եկամուտների կոմիտեի նախագահի տեղակալի ժամանակավոր պաշտոնակատար Ռաֆայել Գևորգյանը։

Պատվիրակության կազմում են նաև վարչապետի մամուլի քարտուղար Մելանյա Հարությունյանը, ԱԳՆ պետական արարողակարգի ծառայության պետ Գագիկ Վանոյանը, վարչապետի աշխատակազմի արտաքին կապերի, տեղեկատվության և հասարակայնության հետ կապերի ստորաբաժանումների ներկայացուցիչներ, ինչպես նաև փոխվարչապետ Մհեր Գրիգորյանի խորհրդականն ու արարողակարգի պատասխանատուն։

Պատվիրակության անդամների օրապահիկի, գիշերավարձի, ներկայացուցչական, փոխադրամիջոցների վարձակալման և այլ ծախսերը կատարվելու են վարչապետի աշխատակազմի, արտաքին գործերի նախարարության, էկոնոմիկայի նախարարության և Պետական եկամուտների կոմիտեի միջոցների հաշվին։

Վարչապետի աշխատակազմի ղեկավարին հանձնարարվել է կազմակերպել օգոստոսի 6-ի Երևան-Իսիկ Կուլ և օգոստոսի 7-ի Իսիկ Կուլ-Երևան չվերթները։ Չվերթի կազմակերպմանն աջակցելու է Քաղաքացիական ավիացիայի կոմիտեն, իսկ ծախսերը կատարվելու են վարչապետի աշխատակազմի պահպանման համար նախատեսված միջոցներից։

Որոշման մեջ այցի օրակարգի, նախատեսվող հանդիպումների և քննարկվող հարցերի վերաբերյալ մանրամասներ չեն ներկայացվում։

Եվգենյա Համբարձումյան