27.09.2026 | 18:41
ՏԻՄ ընտրությունների մասնակցության արդյունքները ըստ համայնքների՝ 17։00-ի դրությամբ
Կառավարությունը նախատեսում է շուրջ 320 մլն դոլարի նոր բյուջետային վարկեր ներգրավել ԱԶԲ-ից և Համաշխարհային բանկից
Քաղաքականություն
05.08.2026 | 13:17
Հայաստանի կառավարությունը նախատեսում է ներգրավել երկու նոր բյուջետային վարկ, որոնք ուղղվելու են 2026 թվականի պետական բյուջեի պակասուրդի ֆինանսավորմանը։ Օգոստոսի 6-ի Կառավարության նիստի օրակարգում չզեկուցվող հարցերի փաթեթով ընդգրկված են Ասիական զարգացման բանկի և Վերակառուցման և զարգացման միջազգային բանկի (ՎԶՄԲ / Համաշխարհային բանկ) հետ վարկային համաձայնագրերի հաստատման նպատակահարմարության մասին նախագծերը: Երկու վարկերն էլ տրամադրվում են լողացող տոկոսադրույքով։
Առաջին վարկը տրամադրում է Ասիական զարգացման բանկը՝ 150 միլիոն ԱՄՆ դոլար ծավալով։ Այն հատկացվում է 15 տարի ժամկետով, որից 3 տարին արտոնյալ է։ Վարկի տարեկան լողացող տոկոսադրույքն այս պահին կազմում է մոտ 4.58 տոկոս։ Ըստ նախագծի հիմնավորման՝ այս միջոցներով նախատեսվում է աջակցել հարկաբյուջետային կառավարմանն ու պետական պարտքի արդյունավետ հսկողությանը, ինչպես նաև զարգացնել պետական արժեթղթերն ու ֆինանսական շուկաները։
Երկրորդ վարկային համաձայնագիրը կնքվել է Համաշխարհային բանկի (ՎԶՄԲ) հետ՝ 170.3 միլիոն եվրո գումարով, որը համարժեք է շուրջ 200 միլիոն ԱՄՆ դոլարի։ Այս ծրագիրն իրականացվում է ՕՊԵԿ-ի միջազգային զարգացման հիմնադրամի հետ համատեղ, որն էլ իր հերթին տրամադրում է 80 միլիոն եվրո։
Համաշխարհային բանկի վարկի ժամկետը 28 տարի է՝ 10 տարի արտոնյալ ժամանակահատվածով, իսկ տարեկան լողացող տոկոսադրույքը կազմում է մոտ 3.93 տոկոս։ Նշվում է, որ վարկային միջոցներն ուղղվելու են տնտեսական վերափոխմանը, ներդրումների ու առևտրի ազատականացմանը, թվայնացմանը, ինչպես նաև՝ «կանաչ» տնտեսությանն անցնելուն և կլիմայական բարեփոխումներին։
Հիշեցնենք, որ այս տարվա առաջին եռամսյակի վերջի դրությամբ Հայաստանի կառավարության պետական պարտքը (ներքին և արտաքին) հասել է ավելի քան 14.07 միլիարդ դոլարի։
Բացի այդ, շուրջ 500 միլիոն դոլարի պարտք ունի նաև ՀՀ Կենտրոնական բանկը։
Անի Թամրազյան
