Երկու տարվա նորոգումից հետո Բելգիայի միապետի աշխատավայրը բացվել է այցելուների համար․ ԼՈՒՍԱՆԿԱՐՆԵՐ

Լուրեր

21.11.2026 | 14:07
Զելենսկի․ Ղրիմի կամուրջը չի պահպանվի, Պուտինը պետք է դա հասկանա, իսկ Ռուսաստանը պետք է զգա, թե ինչ է պատերազմը
21.11.2026 | 13:33
ՀՀ-ԵՄ վիզաների ազատականացման գործընթացն ու սահմանների կառավարման բարեփոխումները քննարկվել են ICMPD-ի փոխտնօրենի հետ
21.11.2026 | 13:06
Բուխարեստի ֆորումում քննարկվել են TRIPP-ն ու Հայաստանի առևտրի դիվերսիֆիկացման հնարավորությունները
21.11.2026 | 12:34
Աբովյանի համայնքային սեփականությանն է վերադարձվել 33 քմ հողատարածք
21.11.2026 | 12:16
NYMEX. Թանկարժեք մետաղների գները նվազել են
21.11.2026 | 11:55
Նարեկ Մկրտչյանը հանդիպել է ԱՄՆ Կոնգրեսի Ներկայացուցիչների պալատի երեք անդամների հետ
21.11.2026 | 11:42
Total Chess. Հայկ Մարտիրոսյանը հաղթել է վերջին խաղային օրը
21.11.2026 | 11:33
Նավթի գները նվազել են
21.11.2026 | 11:11
Արտարժույթների փոխարժեքները՝ նոյեմբերի 21-ի դրությամբ
21.11.2026 | 10:50
Նարեկ Մկրտչյանը մասնակցել է Մելանիա Թրամփի վավերագրական շարքի համաշխարհային պրեմիերային
21.11.2026 | 10:25
Ամփոփիչ մրցաշարում հայտնի են կիսաեզրափակիչի զույգերը. ՏԵՍԱՆՅՈՒԹ
21.11.2026 | 10:15
ՀՀ տարածքում ավտոճանապարհները հիմնականում անցանելի են
21.11.2026 | 09:30
Դավիթ Սիմոնյանը հաղթել է նոկաուտով ու մեդալ ապահովել Մ-23 ԵԱ-ում. ՏԵՍԱՆՅՈՒԹ
21.11.2026 | 00:06
Էդուարդ Սպերցյանը մասնակցեց «Ալ Նասրի» նկատմամբ հաղթանակին. ՏԵՍԱՆՅՈՒԹ
20.11.2026 | 23:39
Հայաստանը համերաշխություն է հայտնում Վրաստանին այս դժվարին պահին. Փաշինյան
Բոլորը

Երկամյա դադարից հետո Բրյուսելի թագավորական պալատը վեց շաբաթով բացել է դռներն այցելուների առջև՝ վերականգնելով 1965 թվականից ձևավորված ավանդույթը։

Թագավորական ընտանիքն այստեղ չի բնակվում։ Պալատը Բելգիայի միապետ Ֆիլիպի և թագուհի Մաթիլդայի հիմնական աշխատավայրն է, որտեղ անցկացվում են պետական ընդունելություններ և դիվանագիտական արարողություններ։

Պալատը սովորաբար հանրության համար բացվում է հուլիսի 21-ին՝ Բելգիայի ազգային օրը, և բաց էր մնում մինչև օգոստոսի վերջ։ Այս տարի այն բացվել է հուլիսի սկզբին և այցելուների կընդունի մինչև օգոստոսի 16-ը։

«Այս տարի սեպտեմբերի սկզբին նախատեսված է պետական այց։ Ուստի թագավորական օրացույցի փոփոխված գրաֆիկը պահանջում է, որ պալատը  պատշաճ վերականգնվի և պատրաստ լինի բարձր մակարդակի պաշտոնական ընդունելության համար»,- Factor TV-ին ասաց Թագավորական պալատի Մեդիայի և հաղորդակցության բաժնի տնօրեն Քսավիե Բաերտը։

Պալատի վերականգնման աշխատանքները, որոնք իրականացրել է Բելգիայի շենքերի գործակալությունը, ներառել են պալատի ճակատային մասերի, քարե աստիճանների, արձանների և պարիսպների մաքրումն ու վերականգնումը։ Ծրագրի ընդհանուր արժեքը կազմել է շուրջ 6 միլիոն եվրո։ Հատուկ ուշադրություն է դարձվել շենքի էներգաարդյունավետությանը. ավելի քան 700 պատուհան վերականգնվել կամ փոխարինվել է բարձր արդյունավետությամբ մեկուսիչ ապակիներով։ Բաերտը շեշտում է՝ ընդհանուր առմամբ իրականացվել է 3,140 քառ. մետր մակերեսով ատաղձագործական աշխատանք։

«Հիմնական մարտահրավերը Թագավորական պալատի ճարտարապետական և պատմական ամբողջականությունը պահպանելն էր՝ միաժամանակ բարելավելով դրա երկարաժամկետ կայունությունն ու աշխատունակությունը։ Յուրաքանչյուր միջամտություն ուշադրությամբ մշակվել է՝ հարգելով շենքի սկզբնական նյութերը, արհեստագործությունը և տեսքը։ Հնարավորության դեպքում սկզբնական տարրերը վերականգնվել են, այլ ոչ թե փոխարինվել»,- ասաց Թագավորական պալատի Մեդիայի և հաղորդակցության բաժնի տնօրենը։

Այս տարվանից Թագավորական պալատի մուտքն այլևս անվճար չէ։ Սահմանվել է 10 եվրո մուտքավճար 13 տարեկանից բարձր անձանց համար, իսկ 12 տարեկան և փոքր տարիքի երեխաների մուտքն անվճար է։ Այս որոշումը պայմանավորված է բյուջետային խնայողություններով. մինչ այժմ այցելուների համար պալատի ամենամյա բացումը ֆինանսավորվում էր Բելգիայի գիտական քաղաքականության դաշնային մարմնի (BELSPO) կողմից, սակայն այդ բյուջեն դադարեցվել է։

Տոմսերի վաճառքից ստացված հասույթը կուղղվի 6-շաբաթյա այս միջոցառման կազմակերպմանը, շենքի անվտանգությանն ու մաքրությանը։

«Տոմսերի վաճառքից ստացված հավելյալ շահույթը չի փոխանցվի Թագավորական պալատին, այլ ներդրվելու է դաշնային գիտական հաստատություններում»,- հայտնեց Քսավիե Բաերտը։

Այս տարի պալատի այցելուները հնարավորություն ունեն տեսնելու պատմական հանդիսությունների սրահները, այգիները և չորս ժամանակավոր ցուցադրությունները։

Արդեն իսկ ամրագրվել է շուրջ 89,000 տոմս, բայց վաճառքը շարունակվում է։ Պալատի ներկայացուցչի խոսքով՝ ակնկալում են, որ այցելուների թիվը կլինի համադրելի նախորդ տարիների հետ, նույնիսկ ավելի բարձր։ Տոմսերը հնարավոր է գնել միայն առցանց։

Իսկ ո՞րն է Բրյուսելի թագավորական պալատի գաղտնիքը։ Factor TV-ի հարցին պատասխանելու համար Քսավիե Բաերտը մի քիչ երկար մտածեց․ «Ոչինչ մտքովս այս պահին չի անցնում»։

Բայց պալատն ունի իր մութ էջերը․ Բելգիայի Լեոպոլդ II թագավորն ընդարձակել է Բրյուսելի թագավորական պալատը Կոնգոյում գաղութային դաժան քաղաքականության արդյունքում ստացված հարստության հաշվին։ Պալատի «Հայելիների սրահի» շինարարությունը սկսվել է Լեոպոլդ II-ի օրոք և նախագծված էր խորհրդանշելու Աֆրիկան ու Կոնգոն (պատերին նախատեսված էին աֆրիկյան թեմատիկայով ալեգորիկ տեսարաններ):

Սրահն այսօր զարդարված է բելգիացի արվեստագետ Ժան Ֆաբրի «Հաճույքի երկինք» աշխատանքով՝ կազմված 1.4 միլիոն թաիլանդական բզեզների թևերից։ 2002 թվականին Ժան Ֆաբրը և նրա 29 օգնականները չորս ամիս շարունակ հատուկ սոսնձով մեկ առ մեկ փակցրել են բզեզների պատյանները:

Չնայած Ֆաբրի հետ կապված սկանդալներին (դատապարտվել է սեռական ոտնձգության համար)՝ պալատը որոշել է պահպանել այս գործը՝ որպես մշակութային ժառանգության մաս:

Կարինե Ասատրյան

Բրյուսել