Մարոկկոյում նշել են իսպանական Սեուտա միգրանտների զանգվածային ներխուժման պատճառը

Մարոկկոյի ներքին գործերի նախարարությունը հրապարակել է անցյալ շաբաթ Իսպանիայի հյուսիսաֆրիկյան Սեուտա էքսկլավ հասնելու փորձի ժամանակ զոհվածների առաջին թիվը՝ 11 մարդ, գրում է France 24-ը։ Մինչ այս, Իսպանիան հայտնել էր առնվազն 72 զոհի մասին։

Չորեքշաբթիից ուրբաթ իսպանական տարածք են անցել տասնյակ հազարավոր պոտենցիալ ներգաղթյալներ, ինչը դիվանագիտական ​​վեճ է առաջացրել Եվրամիության ներսում, քանի որ որոշ անդամ պետություններ քննադատել են Իսպանիայի միգրացիոն քաղաքականությունը։

Մարոկկոյի ՆԳՆ խոսնակ Ռաշիդ Էլ Խալֆին ասել է, որ 11 մահացածներից 10-ը խեղդվել են, իսկ տասնմեկերորդն ընկել է ժայռոտ տարածքից։

Մարոկկոն համագործակցում է Իսպանիայի հետ՝ զոհերի թիվը հստակեցնելու և Իսպանիայի տարածքում հայտնաբերված մարմինները նույնականացնելու համար։

Երկրի ՆԳ նախարարությունը միգրանտների հանկարծակի հոսքը բացատրում է սոցցանցերի «չարամիտ շահագործմամբ» և «մոլորեցնող տեղեկատվության տարածմամբ»։ Այն նաև մեջբերել է «իրավական դրույթների սխալ մեկնաբանությունը»՝ հղում անելով Իսպանիայի Գերագույն դատարանի հուլիսի 8-ի որոշմանը, որ ծովով ժամանող միգրանտները չպետք է արագորեն վերադարձվեն։

ՆԳՆ-ն հայտնել է Սեուտայի սահմանն անօրինական կերպով հատելու 40,000 փորձի մասին։ Եվս 1,135 մարդ փորձել է անօրինական կերպով մուտք գործել Իսպանիայի Մելիլյա էքսկլավ, սակայն անմիջապես վերադարձվել է Մարոկկոյի տարածք։

Իսպանիան, իր հերթին, հայտնում է, որ վերջին օրերին ավելի քան 60,000 մարդ կարողացել է մտնել Սեուտա, որոնց մեծ մասն այժմ վերադարձել է Մարոկկո։ Մարդու իրավունքների Մարոկկոյի ասոցիացիան (AMDH) հայտարարել է «շուրջ 130 զոհի» մասին, տասնյակներն էլ անհետ կորած են համարվում։

Մարոկկոյում պաշտոնական հետաքննություն է սկսվել տեղի ունեցածի վերաբերյալ։

Թարգմանությունը՝ Էմմա Չոբանյանի