21.01.2026 | 23:21
Կառավարությունը հավանություն տվեց Թրամփի՝ «Խաղաղության խորհրդի» կանոնադրության ստորագրման առաջարկությանը
Քարոզարշավի 4 օրերի ընթացքում ՀՀԿ-ն ծախսել է 71 մլն, «Իմ քայլը»՝ 50 մլն, ԲՀԿ-ն՝ 13 մլն դրամ. թվերն աճելու են
Քաղաքականություն
04.12.2018 | 12:45
Ազգային ժողովի արտահերթ ընտրություններին մասնակցող քաղաքական ուժերը նախընտրական քարոզարշավին տասնյակ միլիոններ են ծախսում: Ընտրություններին մասնակցող կուսակցություններն ու կուսակցությունների դաշինքները Կենտրոնական ընտրական հանձնաժողովին են ներկայացրել տեղեկություններ իրենց նախընտրական ծախսերի մասին:
Նշենք, որ մինչ այս պահը ԿԸՀ է ներկայացվել միայն նոյեմբերի 26-ից 30-ը կատարված ծախսերի հաշվետվութունը:
Այսպիսով. հաշվետվության համաձայն՝ ամենամեծ բյուջեով քարոզարշավն իրականացնում է ՀՀԿ-ն: Այս ուժի նախընտրական հիմնադրամում նոյեմբերի 26-ին եղել է 91 մլն դրամ: Մինչև նոյեմբերի 30-ը, այսինքն՝ չորս օրվա ընթացքում, ՀՀԿ-ն ծախսել է 71 մլն դրամը:
Նիկոլ Փաշինյանի ղեկավարած «Իմ քայլը» դաշինքը քարոզարշավին հատկացված 71.9 միլիոնից չորս օրերի ընթացքում ծախսել է 49.5 մլն-ը:
Խոշոր բյուջե ունեցող երրորդ ուժը Գագիկ Ծառուկյանի ղեկավարած «Բարգավաճ Հայաստան» կուսակցությունն է: ԲՀԿ-ի նախընտրական բյուջեն 41.5 մլն է և նշված ժամանակահատվածում ծախսվել է 17.6 մլն դրամ:
ՀՅԴ-ն իր քարոզարշավը նախընտրել է իրականացնել 20 միլիոնի շրջանակում, սակայն ծախսել է 12.7 մլն-ը:
«Սասնա ծռեր» համահայկական կուսակցության բյուջեն 10 մլն 350 հազար դրամ է, որից ծախսվել է 7 մլն դրամը:
«Մենք» կուսակցությունների դաշինքը ևս 10 միլիոնանոց բյուջե ունի, որից քարոզարշավի ընթացքում ծախսել է 8.5 մլն դրամը:
«Լուսավոր Հայաստան» կուսակցությունը 5.7 միլիոնից ծախսել է 3.2 միլիոնը, «Քաղաքացու որոշում» ՍԴԿ-ն էլ 5 մլն-ից 1.5 մլն-ն է ծախսել:
«Օրինաց երկիր» կուսակցությունը ծախսել է իր ամբողջ բյուջեն՝ 3 մլն 800 հազար դրամ, իսկ «Ազգային առաջընթաց» կուսակցությունը 490 հազար դրամանոց բյուջեից նոյեմբերի 26-ից 30-ը չի ծախսել ոչ մի լումա:
«Քրիստոնեա-ժողովրդական վերածնունդ» կուսակցությունը 1.5 մլն-ից շուրջ 1 մլն-ն է ծախսել:
Հիշեցնենք, որ այս տվյալները վերաբերում են նոյեմբերի 26-30-ը կատարված ծախսերին: Կուսակցություններն ու դաշինքներն ազատ են համալրել իրենց հիմնադրամները և շարունակել ծախսեր կատարել նախընտրական քարոզարշավի համար:
Մի քանի օր առաջ, հիշեցնենք, Factor.am-ը, հղում անելով քաղաքական ուժերի հայտարարագրերին, տեղեկացրել էր, թե ի՞նչ ֆինանսական միջոցների են տնօրինում վերջինները:
Այսպիսով. ՀՀԿ-ն ունի 26 մլն դրամական միջոցներ և 345 մլն դրամի եկամուտ, ԲՀԿ-ն, համապատասխանաբար, 22 մլն և 86 մլն, ՀՅԴ-ն՝ 7 մլն և 54 մլն, «Լուսավոր Հայաստանը»-ը՝ 2 մլն և 15 մլն, ՕԵԿ-ը՝ միայն 11 մլն դրամ եկամուտ, «Իմ քայլը»՝ 1.3 մլն դրամական միջոցներ և 7 մլն եկամուտ, «Մենք» դաշինքը՝ 4 մլն եկամուտ, «Ազգային առաջընթացը»՝ 2 մլն դրամական միջոցներ: Մնացած քաղաքական ուժերը դրամական միջոցներ և եկամուտներ չունեն:
Հայկ Վարդանյան
