27.09.2026 | 22:05
ՏԻՄ ընտրություններում մասնակցության ամենաբարձր ցուցանիշը Թումանյանում է. այստեղ առաջադրված միակ ուժը ՔՊ-ն էր
Ռուսաստանը տևական ժամանակ անց առաջին անգամ հյուսիսկորեական հրթիռ է կիրառել․ Զելենսկի
Քաղաքականություն
31.07.2026 | 15:55
Ուկրաինայի նախագահ Վլադիմիր Զելենսկին հայտարարել է, որ նախնական տվյալներով՝ Դնեպրոպետրովկսին հարվածելիս Ռուսաստանի զինված ուժերը երկար ժամանակ ի վեր առաջին անգամ հյուսիսկորեական հրթիռ են կիրառել։
«Իհարկե, կլինեն լրացուցիչ փորձաքննություններ, ամեն ինչ կստուգվի, բայց ներկա գնահատականներով՝ դա հյուսիսկորեական բալիստիկ [հրթիռ] էր»,- գրել է նա։
Reuters-ը, հղում անելով երկու աղբյուրների, նույնպես հաղորդում է, որ հարվածը հասցվել է Հյուսիսային Կորեայում արտադրված հրթիռով։ Գործակալությունը ենթադրում է, որ այս զինամթերքի օգտագործումը երկարատև ընդմիջումից հետո ցույց է տալիս, որ Ռուսաստանը ձեռք է բերել այդ զենքի նոր պաշարներ։
Դնեպրոպետրովսկի մարզի Ռադուշնոյե գյուղում հուլիսի լույս 30-ի գիշերը ռուսական հարվածն ամբողջությամբ ոչնչացրել էր երկու մասնավոր տուն։ Զելենսկիի խոսքով՝ զոհվել են երեք երեխա և նրանց ծնողները։ Ընտանիքի մյուս անդամների ճակատագիրը մնում է անհայտ։
Ավելի վաղ Զելենսկին, հղում անելով հետախուզության տվյալներին, հայտնել էր, որ Ռուսաստանը ցանկանում է Հյուսիսային Կորեայից ստանալ լրացուցիչ 30,000 զինվորականի։ Նա նաև պնդել էր, որ Հյուսիսային Կորեան ծրագրում է Ռուսաստանին փոխանցել բալիստիկ հրթիռների նոր արձակման համակարգեր։
Թարգմանությունը՝ Էմմա Չոբանյանի
