27.09.2026 | 22:05
ՏԻՄ ընտրություններում մասնակցության ամենաբարձր ցուցանիշը Թումանյանում է. այստեղ առաջադրված միակ ուժը ՔՊ-ն էր
Մահափորձ Տուլայում ԱԹՍ-ներ մշակող ընկերության ղեկավարի դեմ
Քաղաքականություն
29.07.2026 | 16:04
ՌԴ Տուլա քաղաքում բազմաբնակարան շենքի մուտքում կրակել են գործարարի վրա։ Այս մասին հայտնել է Քննչական կոմիտեի տարածաշրջանային գրասենյակը, գրում է Meduza-ն։
Հարձակումը տեղի է ունեցել հուլիսի 29-ին Միխեև փողոցի շենքերից մեկում։ Տուժած գործարարը հոսպիտալացվել է։
Քրեական գործ է հարուցվել սպանության փորձի հատկանիշներով։ Քննչական կոմիտեն հայտարարել է, որ հարձակմանը մասնակցած անձինք պարզվում են։ Գերատեսչությունը վիրավոր գործարարի մասին որևէ տեղեկություն չի տրամադրել։
Ուժայիններին մոտ կանգնած Mash և «112» տելեգրամ ալիքները հայտնել են, որ մահափորձն իրականացվել է Օդային տրանսպորտի ռուսական լաբորատորիայի ղեկավար Անդրեյ Չերեզովի դեմ։
Հարձակումը տեղի է ունեցել գիշերը, երբ Չերեզովը տուն էր վերադառնում։ Հարձակվողը սպասել է գործարարին շենքի մուտքի մոտ և երեք անգամ կրակել նրա ուղղությամբ։ Չերեզովի կինը, որը լսել է կրակոցները, շտապօգնություն է կանչել։
Բաց տվյալները ցույց են տալիս, որ Չերեզովի ընկերությունը հիմնադրվել է 2022 թվականին: Mash-ի տվյալներով՝ ընկերությունը վերջերս Վորոնեժի պետական տեխնիկական համալսարանին անօդաչու թռչող սարքերի մատակարարման պատվեր է ստացել՝ գիտական աշխատանքների համար: Չի նշվում՝ արդյո՞ք ընկերությունը որևէ կապ ունի ռազմական գործունեության հետ։
Թարգմանությունը՝ Էմմա Չոբանյանի
