27.09.2026 | 22:23
Համաշխարհային օլիմպիադա. Հայաստանի հավաքականները երրորդն են A խմբում. ԼՈՒՍԱՆԿԱՐՆԵՐ
Ադրբեջանի ԱԳՆ-ն արձագանքել է Զախարովայի՝ ԼՂ հակամարտության ու ՀԱՊԿ-ի մասին հայտարարությանը
Քաղաքականություն
28.07.2026 | 12:53
«Ռուսաստանի ԱԳՆ մամուլի քարտուղար Մարիա Զախարովայի հայտարարությունները, որոնք կրկին առնչվել են հայ-ադրբեջանական նախկին հակամարտության թեմային, իրականության աղավաղում են»,- հայտարարել է Ադրբեջանի ԱԳՆ խոսնակ Այխան Հաջիզադեն՝ պատասխանելով Զախարովայի՝ Ղարաբաղյան տարածաշրջանի և ՀԱՊԿ-ի հետ կապված մեկնաբանությունների վերաբերյալ հարցին։
«Ղարաբաղի տարածաշրջանը միշտ ճանաչվել է միջազգային հանրության, այդ թվում՝ Ռուսաստանի Դաշնության կողմից, որպես Ադրբեջանի անբաժանելի մաս։ Հետևաբար, ՀԱՊԿ մեխանիզմների կիրառման հարցը Ադրբեջանի ինքնիշխան տարածքներում, որոնք 30 տարի օկուպացված են եղել Հայաստանի կողմից, անընդհատ օրակարգ բերելու և դա Հայաստանի կողմից Ղարաբաղյան տարածաշրջանի ճանաչման հետ կապելու փորձերը ոչ միայն հակասում են Ռուսաստանի պաշտոնական դիրքորոշմանը Ադրբեջանի Ղարաբաղյան տարածաշրջանի վերաբերյալ, այլև բացարձակապես անհիմն են»,- հայտարարել է Հաջիզադեն։
Նա ասել է, թե «Ադրբեջանը վերականգնել է իր տարածքային ամբողջականությունն ու ինքնիշխանությունը՝ համաձայն միջազգային իրավունքի պահանջների, և այդպիսով նախկին հակամարտությունը լուծվել է»։
«Այս առումով, պետք է դադարեցվի ռուս-հայկական հարաբերություններին վերաբերող հարցերն Ադրբեջանի հետ կապված մեկնաբանելու պրակտիկան»,- ասել է նա։
Հիշեցնենք՝ Զախարովան հայտարարել էր, թե ՀԱՊԿ-ի՝ Լեռնային Ղարաբաղի շուրջ հակամարտությանը ներգրավվածությունն անհնար էր, քանի որ նույնիսկ Հայաստանը չէր ճանաչում այդ տարածքը։
Թարգմանությունը՝ Էմմա Չոբանյանի
