Ինչպես են իրականացվել գաղտնալսումները․ Հակակոռուպցիոն կոմիտեի փոխնախագահը մանրամասներ է պատմում. ՏԵՍԱՆՅՈՒԹ

Քանի՞ քրեական վարույթ է նախաձեռնվել նախընտրական, քարոզարշավային և հետընտրական շրջանում՝ ենթադրյալ ընտրական հանցագործությունների առնչությամբ, քանի՞ մարդ է ձերբակալվել, և քանի՞ գործ է արդեն ուղարկվել դատարան, ո՞ր կուսակցություններին և դաշինքներին են առնչվում քրեական վարույթները, ի՞նչ հիմքերով են իրականացվել գաղտնալսումները, ինչո՞ւ քրեական վարույթներ չկան իշխող՝ «Քաղաքացիական պայմանագիր» կուսակցության ներկայացուցիչների նկատմամբ, ինչո՞ւ իրավական գնահատական չի տրվել լրագրողների բացահայտած այն դեպքերին, երբ մարդկանց պարտադրված տարել են իշխանական ուժի հավաքներին։ Հակակոռուպցիոն կոմիտեի նախագահի տեղակալ Արմեն Ասատրյանը Factor TV-ի հետ զրույցում անդրադարձել է այս և օրակարգային մի շարք այլ հարցերի։

Ըստ պաշտոնական տվյալների՝ Հակակոռուպցիոն կոմիտեում այս պահին քննվել կամ քննվում է շուրջ 199 քրեական վարույթ՝ ընտրակաշառք տալու, ստանալու, ընտրողի ազատ կամքի իրականացմանը խոչընդոտելու և նյութապես շահագրգռելու հոդվածների հատկանիշներով։ 56 վարույթ՝ 193 անձի վերաբերյալ, արդեն իսկ մեղադրական եզրակացությամբ ուղարկվել է դատարան։ 72 վարույթ գտնվում է նախաքննության փուլում, որոնց շրջանակներում կա 81 մեղադրյալ։ Ընդհանուր առմամբ ձերբակալվել է 263 անձ։ Հանրային քրեական հետապնդում է հարուցվել 287 անձի նկատմամբ։

Հատկանշական է, որ քննվող դեպքերը հիմնականում առնչվել են «Ուժեղ Հայաստան», «Բարգավաճ Հայաստան» կուսակցություններին և «Հայաստան» դաշինքին։ 

Արմեն Ասատրյանի խոսքով՝ ընտրական կոռուպցիան իր բնույթով լատենտային է, քանի որ և՛ տվողը, և՛ ստացողը շահագրգռված են գործարքը գաղտնի պահելու մեջ։

«Բացահայտման հիմքում ընկած է երկարատև օպերատիվ աշխատանքը, որը կարող է տևել 2-ից մինչև 12 ամիս»,- շեշտում է Ասատրյանը։

Ի պատասխան մեղադրանքներին, թե տեսանյութերը «մոնտաժված» են, նա նշեց. «Մոնտաժել՝ չի նշանակում կեղծել։ Մոնտաժն իրականացվում է բացառապես անձի անձնական և ընտանեկան կյանքի գաղտնիությունը պահպանելու համար։ Հրապարակվում են միայն այն հատվածները, որոնք ունեն իրավական նշանակություն և փաստում են հանցանքի կատարումը»։

Ինչո՞ւ Հակակոռուպցիոն կոմիտեի տեսադաշտում չեն հայտնվում իշխող «Քաղաքացիական պայմանագիր» կուսակցության ներկայացուցիչները՝ չնայած մամուլում եղած բազմաթիվ հրապարակումների։ Ըստ Ասատրյանի՝ իրավական տեսանկյունից ոչ ամեն բարեգործություն կամ աշխատանք է համարվում ընտրական հանցագործություն։ 

«Որպեսզի գործողությունը որակվի որպես ընտրակաշառք, պետք է լինի հստակ գործարքային կապ՝ ծառայությունը մատուցվում է քվեարկության նախապայմանով։ Եթե համայնքի ղեկավարն իրականացնում է բյուջեով նախատեսված ասֆալտապատում կամ աղբահանություն, դա իր պարտականությունն է, որը պետությունը չի կարող դադարեցնել ընտրությունների պատճառով»,- նշեց նա։

Նույն տրամաբանությամբ է մեկնաբանվում նաև նախընտրական շրջանում կենսաթոշակների բարձրացումը։ Ըստ կոմիտեի՝ դա պետական ռազմավարական ծրագիր է, որը կապ չունի ընտրակաշառքի հետ։

Մանրամասները՝ տեսանյութում։

Ռոզա Վարդանյան