27.09.2026 | 22:05
ՏԻՄ ընտրություններում մասնակցության ամենաբարձր ցուցանիշը Թումանյանում է. այստեղ առաջադրված միակ ուժը ՔՊ-ն էր
ՌԴ հրթիռային հարված է հասցրել Կիևին, մասնավոր զորավարժարանին․ 10 զոհ, շուրջ 100 վիրավոր կա
Քաղաքականություն
24.07.2026 | 17:41
Հուլիսի 24-ի Ռուսաստանը հրթիռային հարված է հասցրել Կիևին և Կիևի մարզին։ Ուկրաինական լրատվամիջոցները, հղում անելով պաշտպանական սարքավորումներ արտադրող «First Contact» ընկերության հիմնադիր Վալերի Բորովիկին, հաղորդել են, որ ռուսական ուժերը հարվածել են Կիևի մարզի Բուչանսկի շրջանում գտնվող զորավարժարանին, գրում է Meduza-ն։
Բորովիկի խոսքով՝ վարժարանում զենքի ցուցահանդես է տեղի ունեցել։ Նա ասել է, որ կան զոհեր՝ առանց լրացուցիչ մանրամասներ հաղորդելու։
«Зеркало недели»-ն հաղորդում է, որ ցուցահանդեսին մասնակցել են «ուկրաինական պաշտպանական արդյունաբերության» ներկայացուցիչները, իսկ միջոցառման վայրը գաղտնի է պահվել։
Ուկրաինայի նախագահ Վլադիմիր Զելենսկին իր տելեգրամ ալիքում գրել է Կիևի մարզում փրկարարական գործողության մասին։ Նա հայտնել է, որ ռուսական հարվածի հետևանքով այնտեղ զոհվել է 6 մարդ։ Զելենսկին գրել է, որ հայտնի են «տասնյակ տուժածների» մասին՝ առանց լրացուցիչ մանրամասներ բացահայտելու։
Կիևի տարածաշրջանային ռազմական վարչակազմը հայտնել է, որ նախնական տեղեկությունների համաձայն՝ ռուսական ուժերը հարվածել են «մասնավոր զորավարժարանին, որտեղ միջոցառում էր տեղի ունենում»։ Կիևի տարածաշրջանային ռազմական վարչակազմի ղեկավարի պաշտոնակատար Ռուսլան Օլեյնիկը հայտնել է, որ կան զոհեր և վիրավորներ՝ հավելելով, որ միջադեպի մանրամասները քննվում են։
Униан-ը հաղորդում է, որ հուլիսի 24-ին Կիևի մարզում անցկացվել է «Արմադա» ցուցահանդեսը, որտեղ ներկայացվել են «կարևոր ենթակառուցվածքները ժամանակակից օդային սպառնալիքներից պաշտպանելու համապարփակ լուծումներ»։
Կիևի քաղաքապետ Վիտալի Կլիչկոն իր տելեգրամ ալիքում հայտարարել է, որ քաղաքում հայտարարվել է հրթիռային տագնապ, բնակիչներին ապաստաններում մնալու կոչ է արվել։ УНИАН-ը, հղում անելով մոնիթորինգային նախագծերին, հաղորդել է, որ հուլիսի 24-ին Ուկրաինայի մայրաքաղաքի վրա արձակվել է շուրջ 10 «Ցիրկոն» հրթիռ։
Ուկրաինայի գլխավոր դատախազ Ռուսլան Կրավչենկոն հայտնել է Կիևի մարզի վրա ռուսական հարվածի հետևանքով 10 զոհի և շուրջ 100 վիրավորի մասին: Հետաքննություն է սկսվել «միջոցառման կազմակերպման և անցկացման ընթացքում ծառայողական պարտականությունները ոչ պատշաճ կատարելու համար, որը հանգեցրել է մահվան և այլ լուրջ հետևանքների»։
Թարգմանությունը՝ Էմմա Չոբանյանի
