Ռոբերտ Քոչարյանին կալանավորելու հարցի քննությունը Վերաքննիչ դատարանում. ՈՒՂԻՂ

Այս պահին Վերաքննիչ քրեական դատարանում տեղի է ունենում Ռոբերտ Քոչարյանի նկատմամբ ընտրված խափանման միջոց կալանավորման հարցով դատական նիստը։ Գլխավոր դատախազությունը բողոքարկում է Վերաքննիչ ատյանի որոշումը, որով Քոչարյանի նկատմամբ կիրառված խափանման միջոց կալանավորումը վերացվել էր անձեռնմխելիության հիմքով։

Գլխավոր դատախազությունը գտնում է, որ Քոչարյանի նկատմամբ պետք է կալանավորումը ընտրվի որպես խափանման միջոց ոչ միայն անձեռնմխելիության հիմքով՝ առկա են կալանքի այլ հիմքեր: Մասնավորապես՝ ազատության մեջ մնալով Քոչարյանը կարող է թաքնվել և խոչընդոտել գործի քննությանը:

Դատական նիստը նախագահում է դատավոր Ռուբեն Մխիթարյանը։

Հիշեցնենք, որ Քոչարյանի նկատմամբ ընտրված է խափանման մեկ այլ միջոց՝ ստորագրություն չհեռանալու մասին։

Ռոբերտ Քոչարյանը 2008 թվականի «Մարտի 1-ի» քրեական գործով մեղադրվում է սահմանադրական կարգը տապալելու համար: Հուլիսի 27-ին Երևանի ընդհանուր իրավասության դատարանը նրա նկատմամբ խափանման միջոց էր ընտրել կալանավորումը:

Օգոստոսի 13-ին Վերաքննիչ դատարանը վերացրեց Առաջին ատյանի դատարանի որոշումը և բավարարեց Ռոբերտ Քոչարյանի պաշտպանների ներկայացրած՝ խափանման միջոց կալանքը փոխելու միջնորդությունը: Քոչարյանն ազատ արձակվեց։

Նոյեմբերի 15-ին Վճռաբեկ դատարանը հրապարակեց որոշում, ըստ որի՝ «Մարտի 1-ի» գործով սահմանադրական կարգը տապալելու համար մեղադրվող Ռոբերտ Քոչարյանի խափանման միջոցի հարցը նորից կքննվի Վերաքննիչ քրեական դատարանում։

Քոչարյանի պաշտպանները հայտարարում են, որ բազմաթիվ միջնորդություններ ունեն ներկայացնելու դատարանին, ինչպես և՝ նվազագույնը 3 բողոքի մասին են խոսել։ Դատարանը սահմանել է կարգ, ըստ որի՝ նախ բողոքները կլսեն, հետո Դատախազությունը առարկություններով հանդես կգա։ Դրան կհաջորդ միջնորդությունների փուլը։

Քոչարյանի պաշտպաններից Հայկ Ալումյանը նախորդ նիստին սկսեց ներկայացնել բողոքներից մեկը։ Ըստ փաստաբանի՝ հուլիսի 27֊ին Առաջին ատյանի դատարանը ճնշումների ներքո է Քոչարյանին կալանավորել, ինչն ապացուցվում է ԱԱԾ տնօրենի և ՀՔԾ պետի խոսակցության գաղտնալսումով։ Այդ խոսակցությունից ստացվում է, որ կալանավորման միջնորդությունը ներկայացված է եղել ոչ թե կանխելու անձի փախուստը, այլ անձանց ցուցմունք տալ ստիպելու նպատակով։ Այսինքն, Քոչարյանի պաշտպանական թիմը կարծում է, որ այդ միջնորդություններն օրինական նպատակ չեն հետապնդել։