Ղազախստանը սահմանափակել է իր տարածք մեքենաների մուտքն ու ելքը՝ ՌԴ-ում վառելիքի պակասի ֆոնին

Ղազախստանը սահմանափակել է հարևան երկրներից բեռնատարների ու թեթև ուղևորատար մեքենաների մուտքն ու ելքը՝ հասցնելով օրական մեկ անգամի։ Այս մասին հայտարարել է երկրի էներգետիկայի փոխնախարար Կայիրխան Տուտկիշբաևը, գրում է Current time-ը։

«Ե՛վ բեռնատար, և՛ մարդատար ավտոմեքենաները կարող են Ղազախստան մուտք գործել և դուրս գալ օրական մեկ անգամից ոչ ավելի։ Սա կօգնի պահպանել վառելիքի սպառման հավասարակշռությունը»,- ասել է նա։

Պաշտոնյայի խոսքով՝ վերջերս վառելիքի սպառումը «զգալիորեն աճել է» սահմանամերձ շրջաններում՝ Արևմտյան Ղազախստանում, Ակտոբեում և Պավլոդարում։ Այս երեք շրջաններն էլ սահմանակից են Ռուսաստանին։

Ռուսներն ավելի վաղ հայտնել էին, որ ստիպված են եղել մեկնել Ղազախստան՝ իրենց մեքենաները լիցքավորելու։ Մայիսի վերջից ի վեր վառելիքի պակաս է ինչպես Ռուսաստանում, այնպես էլ նրա կողմից օկուպացված ուկրաինական տարածքներում՝ Ուկրաինայի զինված ուժերի կողմից նավթավերամշակման գործարանների և նավթամշակման այլ օբյեկտների վրա հարվածներից հետո։ Իշխանությունները բենզինի վաճառքի սահմանափակումներ են մտցրել։

Տուտկիշբաևը նշել է, որ աշխատանք է տարվում՝ վառելիքի լրացուցիչ բաքերով մեքենաները հայտնաբերելու համար, որոնք օգտագործվում են անօրինական կերպով վառելիք արտահանելու նպատակով։ Նա հավելել է, որ իրավապահները պարբերաբար սահմանին հայտնաբերում են խախտողներին։

Էներգետիկայի նախարարությունը, ազգային ընկերությունների հետ համատեղ, ձևավորել է վառելիքի ռեզերվ և վերահսկում է ներքին սպառման հաշվեկշիռը, վստահեցրել է պաշտոնյան։

Հուլիսի 6-ին Ուկրաինան հարվածել էր Օմսկի նավթավերամշակման գործարանին։ Reuters-ի տվյալներով՝ հարձակման հետևանքով վնասվել են նավթի առաջնային մշակման երկու հիմնական սարքավորումները։ Գործարանը դադարեցրել է աշխատանքը։ Տուտկիշբաևը հայտարարել է, որ այդ հարձակումը չի ազդի Ղազախստանի նավթավերամշակման գործարանների գործունեության վրա և չի հանգեցնի երկրում վառելիքի պակասի։

Թարգմանությունը՝ Էմմա Չոբանյանի