Մեծ Բրիտանիան ռուսական ինքնաթիռ է որսացել Արկտիկայում

Բրիտանական կործանիչները Նորվեգական ծովում բրիտանական ռազմանավերին մոտեցող ռուսական ինքնաթիռներ են որսացել։ Մեծ Բրիտանիայի պաշտպանության նախարարությունն այս մասին հայտարարել է X-ում, գրում է DW-ի ռուսական ծառայությունը։

Նշվում է, որ բրիտանական ռազմածովային ուժերի խումբը տեղակայվել է Արկտիկայում՝ ՆԱՏՕ-ի ընդլայնված առաքելության շրջանակում։

Մեծ Բրիտանիայի ՊՆ-ն հայտարարել է, որ Bear F տիպի հակասուզանավային ինքնաթիռը (ՆԱՏՕ-ի կողմից ռուսական Տու-142-ների համար նախատեսված անվանումը) բազմիցս մոտեցել է բրիտանական նավերի խմբին Նորվեգական ծովում՝ կատարելով «անվտանգ և ոչ պրոֆեսիոնալ» մանևրներ։ Բրիտանական ՊՆ-ի տվյալներով՝ ռուսական ինքնաթիռները նետել են սուզանավերը հայտնաբերելու և հետևելու սարքեր՝ HMS Prince of Wales ավիակիրի անմիջական մոտակայքում։ Ի պատասխան՝ հուլիսի 2-ին F-35B կործանիչները բարձրացել են նավի տախտակամածից՝ որսալով և ուղեկցելով ռուսական ինքնաթիռներին։

Մեծ Բրիտանիայի պաշտպանության նախարար Դեն Ջարվիսը հրաժարվել է հաստատել Poltico-ին՝ արդյո՞ք ավիակիրը հետևել է ՌԴ նախագահ Վլադիմիր Պուտինին վերագրվող զբոսանավի տեղաշարժերին, որը, ըստ լրատվամիջոցների հաղորդագրությունների, այժմ Նորվեգիայի ափերի մոտ է և վերադառնում է Ռուսաստան:

«Մենք գիտենք, թե որտեղ է այն»,- ասել է Ջարվիսը՝ վկայակոչելով Ռուսաստանի ղեկավարության վրա «աճող ճնշումը»։

Փետրվարին Եվրոպայում ՆԱՏՕ-ի դաշնակից ուժերի շտաբը հայտարարել էր «Արկտիկական պահապան» առաքելության մեկնարկի մասին՝ Ռուսաստանի ռազմական ակտիվության աճի և Չինաստանի՝ աճող հետաքրքրության ֆոնին:

Ապրիլին Լոնդոնը հայտարարել էր «Հյուսիսային նավատորմ» դաշինքի ստեղծման մասին՝ հյուսիսարևմտյան Եվրոպայում և Արկտիկայի տարածքում պաշտպանությունն ամրապնդելու համար: Դաշինքը կհիմնվի Համատեղ արշավախմբային ուժերի (JEF) վրա, որը ներառում է Միացյալ Թագավորության, Դանիայի, Ֆինլանդիայի, Էստոնիայի, Իսլանդիայի, Լատվիայի, Լիտվայի, Նիդերլանդների, Շվեդիայի և Նորվեգիայի զինծառայողներին։

Բրիտանական նավատորմն ավելի ակտիվ է դարձել ոչ միայն Արկտիկայում: Հունիսի կեսերին այն առաջին անգամ Լա Մանշում կալանել էր նավթ տեղափոխող ռուսական «ստվերային նավատորմի» լցանավ: Ֆրանսիայի հետ համատեղ գործողությունը տևել էր վեց ժամ:

Թարգմանությունը՝ Էմմա Չոբանյանի