Զելենսկին արձագանքել է Կիևին ռուսական զանգվածային հարվածին․ Ուկրաինան ՄԱԿ-ի ԱԽ արտակարգ նիստ է խնդրել

Ուկրաինայի նախագահ Վլադիմիր Զելենսկին հայտարարել է, որ Կիևի մարզի վրա ռուսական գիշերային հարձակման հետևանքով զոհերի թիվը հասել է երեքի։ Մարզային ռազմական վարչակազմը նախկինում հայտնել էր Բուչայի շրջանում մեկ զոհի մասին։ Զելենսկին նաև գրել է, որ վիրավորվել է 16 մարդ, գրում է BBC-ի ռուսական ծառայությունը։

Կիևի և մարզի վրա հարձակումը վերջին օրերին տարածաշրջանի վրա երկրորդ զանգվածային հարվածն էր։ Զելենսկիի խոսքով՝ ռուսական ուժերը գիշերը Կիևի վրա արձակել են 68 հրթիռ և 351 հարվածային անօդաչու թռչող սարք, ինչը վնաս է հասցրել քաղաքի ավելի քան 10 վայրերի, այդ թվում՝ բնակելի շենքերի։

Նա ասել է, որ փլատակներից հաջողվել է փրկել 64 մարդու, այդ թվում՝ երկու երեխայի։ 11 մարդ զոհվել է, շուրջ 60-ը՝ վիրավորվել։

«Մեր զինվորները լավ արդյունքներ են ցույց տվել անօդաչու թռչող սարքերի և թևավոր հրթիռների խոցման գործում, բայց, ցավոք, ոչ ռուսական բալիստիկ հրթիռների դեմ։ Եվ պատճառը հենց հակահրթիռային համակարգերի անբավարար մատակարարումն է։ Կարևոր է, որ աշխարհը, մասնավորապես, Ամերիկան ​​և մեր եվրոպացի գործընկերներն Անկարայում ՆԱՏՕ-ի գագաթնաժողովից դուրս գան մեր երկնքի պաշտպանությանը, հետևաբար, սովորական մարդկանց կյանքի պաշտպանությանն աջակցող վճռական որոշումներով։ Քանի դեռ Patriot հրթիռները մնում են դաշնակիցների պահեստներում, դա միայն խրախուսում է Ռուսաստանին՝ շարունակել «հաղթել» բնակելի շենքերին։ ԱՄՆ-ն ու Եվրոպան ունեն այս ահաբեկչությունը դադարեցնելու բավարար  ուժ»,- նշել է Զելենսկին՝ կոչ անելով դաշնակից երկրներին որոշում ընդունել ավելացնել մատակարարումները։

Հուլիսի 6-ի առավոտյան Ռուսաստանի Պաշտպանության նախարարությունը հայտարարել էր, որ հարձակվել է Կիևի ռազմական թիրախների վրա, այդ թվում՝ ռազմական տեխնիկայի և անօդաչու թռչող սարքերի արտադրողների։ Ռուսական զինված ուժերը չեն մեկնաբանել քաղաքի վրա հարվածների հետևանքով քաղաքացիական բնակչության շրջանում զոհերը։

Հուլիսի 7-ը Կիևում հայտարարվել է սգո օր։

Միաժամանակ, հուլիսին Կիևի վրա երկու լայնածավալ հարձակումներից հետո Ուկրաինան ՄԱԿ-ի Անվտանգության խորհրդի արտակարգ նիստ է խնդրել։ Այս մասին հայտարարել է Ուկրաինայի արտաքին գործերի նախարար Անդրեյ Սիբիհան։

«Ուշացած կամ թույլ արձագանքները չեն կարող կանգնեցնել ահաբեկչությունը։ Միայն ուժեղ, սկզբունքային և ժամանակին կատարված գործողությունները կարող են դա անել։ Միջազգային հանրությունը պետք է միավորվի՝ ագրեսորին զսպելու և շարունակելու խթանել համապարփակ, արդար և երկարատև խաղաղությունը՝ համաձայն ՄԱԿ-ի կանոնադրության»,- գրել է Սիբիհան։

Թարգմանությունը՝ Էմմա Չոբանյանի