Հորմուզի նեղուցը կկառավարվի Թեհրանի կողմից․ ԱՄՆ-ի հետ կապի գիծ կստեղծվի․ Ղալիբաֆ

Հորմուզի նեղուցը կկառավարվի Թեհրանի կողմից։ Իրանական պետական ​​լրատվամիջոցների հաղորդմամբ՝ Իսլամական Հանրապետության դեմ ԱՄՆ-Իսրայել պատերազմի դադարեցմանն ուղղված բանակցություններից հետո հայտարարել է Իրանի գլխավոր բանակցող, երկրի խորհրդարանի նախագահ Մոհամմադ Բաղեր Ղալիբաֆը, գրում է France 24-ը։

Իրանը և Միացյալ Նահանգները երկուշաբթի համաձայնության էին եկել կապի գծեր ստեղծել՝ կենսականորեն կարևոր նավագնացության ուղին բաց պահելու և Լիբանանում մարտական ​​գործողությունները դադարեցնելու համար, հայտարարել էին միջնորդները Շվեյցարիայում Մերձավոր Արևելքի  հակամարտությանը վերջ դնելուն ուղղված բանակցությունների առաջին փուլից հետո։

«Հորմուզի նեղուցը երբեք չի վերադառնա իր նախապատերազմյան վիճակին և կկառավարվի Իրանի Իսլամական Հանրապետության կողմից՝ համաձայն միջազգային իրավունքի»,- ըստ IRNA-ի՝ ասել է Ղալիբաֆը։

Նա նաև հավելել է, որ շվեյցարական Բուրգենշտոկ հանգստավայրում բանակցությունները «լավ ձեռքբերումներ» են արձանագրել։

«Իմ կարծիքով՝ այս ուղևորությունը լավ ձեռքբերումներ է արձանագրել, մասնավորապես, նեղուցի հարցի քննարկման, Լիբանանի հետ կապված քննարկումների, նավթի հարցի և սառեցված միջոցների ազատման հարցում»,- ասել է նա։

Բացի այդ, Իրանը համաձայնել է ստեղծել Հորմուզի նեղուցի հարցով «կապի թեժ գիծ»՝ «կանխելու և լուծելու ցանկացած կոնֆլիկտ և թյուրըմբռնում» ԱՄՆ-ի կամ այլ երկրների հետ, որոնք կարող են առաջանալ կենսականորեն կարևոր ջրային ուղիով նավերի անցման ընթացքում։ Ղալիբաֆը վստահեցրել է՝ Իրանը «հստակորեն կկիրառի միջազգային օրենքները» և արագ կգործի՝ ցանկացած խնդիր կամ թյուրըմբռնում լուծելու համար:

«Բնականաբար, ինչպես Լիբանանում կամ այլուր կարող են խնդիրներ առաջանալ, խնդիրներ կարող են առաջանալ նաև Հորմուզի նեղուցում։ Ինչպես տեսանք՝ նույնիսկ բախումներ են եղել»,- ասել է նա:

Թեժ գծի նպատակի մասին հարցին Ղալիբաֆը պատասխանել է. «Եթե ամերիկացիները որևէ առարկություն ունենան որևէ բանի վերաբերյալ կամ եթե որևէ նավի անձնակազմ պարզաբանման կարիք ունի որևէ երթուղու կամ այլ բանի վերաբերյալ, նրանք կարող են զանգահարել»:

Ղալիբաֆը նաև հայտարարել է, որ Շվեյցարիայում բանակցությունների ընթացքում վերջնականապես որոշվել են Իրանի սառեցված միջոցներից 12 միլիարդ դոլարի հասանելիությունը և նավթային պատժամիջոցների վերացման հետ կապված մանրամասները:

Թարգմանությունը՝ Էմմա Չոբանյանի