Ռուս-հայկական հարաբերությունները վերաիմաստավորման փուլում են․ Կոպիրկին

Հայաստանում Ռուսաստանի օրվա առթիվ կազմակերպված միջոցառման ընթացքում ՌԴ դեսպան Սերգեյ Կոպիրկինը հայտարարել է, որ ռուս-հայկական հարաբերությունները հասել են վերաիմաստավորման և փոփոխվող գլոբալ ու տարածաշրջանային իրողություններին հարմարվելու փուլին՝ միաժամանակ ընդգծելով երկկողմ համագործակցության ամուր հիմքերը։

«Հունիսի 12-ին, Ռուսաստանի օրվա առթիվ, հանդիսավոր ընդունելություն է տեղի ունեցել Երևանում:

Տոնական միջոցառմանը մասնակցել են ՀՀ Ազգային ժողովի նախագահ Ալեն Սիմոնյանը, փոխվարչապետ Մհեր Գրիգորյանը, պատգամավորներ, կառավարության անդամներ, պետական մարմինների ղեկավարներ, դիվանագիտական կորպուսի ներկայացուցիչներ, հոգևոր, հասարակական, մշակութային, գիտական և մեդիա շրջանակների ներկայացուցիչներ, Հայրենական մեծ պատերազմի վետերաններ, հայրենակցական կազմակերպությունների անդամներ և երիտասարդ ակտիվիստներ։

Ողջույնի խոսքում Հայաստանում Ռուսաստանի դեսպան Սերգեյ Կոպիրկինը նշել է, որ այս տոնը կոչված է արտացոլելու հայրենիքի հազարամյա ուղին՝ լի հերոսությամբ, անձնվիրական աշխատանքով, մեծ հաղթանակներով և աշխատանքային ձեռքբերումներով։

Ռուս դիվանագիտական առաքելության ղեկավարը ընդգծել է, որ այսօր ռուս-հայկական միջպետական համագործակցությունը հիմնված է բարձրագույն և բարձր մակարդակներում կայուն ու փոխադարձ հարգանքի վրա կառուցված քաղաքական երկխոսության, միջկառավարական, միջխորհրդարանական և միջգերատեսչական ձևաչափերի, միջտարածաշրջանային կապերի, ինչպես նաև ամուր պայմանագրաիրավական բազայի վրա։ Միաժամանակ, նրա խոսքով, ակնհայտ է, որ երկկողմ հարաբերությունները հասել են վերաիմաստավորման և փոփոխվող գլոբալ ու տարածաշրջանային իրողություններին հարմարվելու փուլին։

Սերգեյ Կոպիրկինը վերահաստատել է Մոսկվայի պատրաստակամությունը՝ շարունակելու համատեղ, կառուցողական և փոխշահավետ աշխատանքը՝ հիմնվելով առկա երկկողմ և բազմակողմ համագործակցության մեխանիզմների վրա։

Միջոցառման հյուրերին ներկայացվել են համերգային ծրագիր, ՌԻԱ Նովոստիի «Սովինֆորմբյուրոյին՝ 85 տարի. Կենդանացած պատմություն. Դարաշրջանը՝ լուսանկարներում» մուլտիմեդիա ֆոտոցուցահանդեսը, ինչպես նաև ժամանակակից Ռուսաստանի մասին տեսանյութերի ընտրանի»,- ասված է ՀՀ-ումմՌԴ դեսպանության տարածած հաղորդագրությունում։