Քաղաքականություն
11.06.2026 | 21:18
Թուրքիայի Պաշտպանության նախարարությունը հայտարարել է, որ Ֆրանսիայի և Կիպրոսի միջև ստորագրված պաշտպանական համաձայնագիրը, որը թույլ է տալիս ֆրանսիական զորքերի ներկայությունը բաժանված միջերկրածովյան կղզում, խախտում է միջազգային իրավունքը և Կիպրոսի սահմանադրական կարգը հաստատող 1960 թվականի պայմանագրերը, գրում է Turkish Minute-ը։
Երկուշաբթի Փարիզի և Նիկոսիայի կողմից ստորագրված համաձայնագիրը նպատակ ունի խորացնել երկկողմ պաշտպանական կապերը և նպաստել Եվրամիության համար ավելի մեծ ռազմավարական ինքնավարությանը։ Այն նաև շրջանակ է ապահովում Կիպրոսում ֆրանսիական ուժերի տեղակայման համար։ Ֆրանսիայի նախագահ Էմանուել Մակրոնն ապրիլին կատարած այցի ժամանակ ասել էր, որ այն կաջակցի «մարդասիրական գործողություններին Արևելյան Միջերկրական ծովում և Մերձավոր Արևելքում»։
Անկարան խստորեն քննադատել է գործարքը՝ զգուշացնելով, որ այն կարող է խախտել կղզու փխրուն հավասարակշռությունը։
«Կիպրոսում երաշխավորի կարգավիճակ չունեցող Ֆրանսիայի և Կիպրոսի հունական վարչակազմի միջև ստորագրված համաձայնագիրը, որը ձգտում է միակողմանիորեն փոխել կղզու փխրուն հավասարակշռությունն ու անտեսում է կիպրոսցի թուրքերի կամքն ու հավասար ինքնիշխան իրավունքները, հակասում է 1960 թվականի Կիպրոսի համաձայնագրերին և միջազգային իրավունքին»,- ասվում է նախարարության հայտարարության մեջ։
Անկարան նաև զգուշացրել է, որ Թուրքիան կպատասխանի կիպրոսցի թուրքերի դեմ ուղղված ցանկացած սպառնալիքի՝ նշելով, որ թուրքական զինված ուժերն «ունեն կարողություններ և վճռականություն՝ ամենաուժեղ ձևով արձագանքելու կիպրոսցի թուրքերի անվտանգությանը սպառնացող թշնամական գործողություններին»։
Կիպրոսը բաժանված է 1974 թվականից, երբ Թուրքիան ներխուժել է կղզու հյուսիսային մեկ երրորդ մասը՝ ի պատասխան կիպրոսցի հույների կողմից Հունաստանի հետ միավորվելու նպատակով կազմակերպված հեղաշրջման։
Թարգմանությունը՝ Էմմա Չոբանյանի
