11.06.2026 | 19:28
Ի՞նչ կապ ունի Լիդյան այդ զենքերի հետ. ո՛չ մի կապ. Բագրատ արքեպիսկոպոս Գալստանյանը վրդովվեց. ՏԵՍԱՆՅՈՒԹ
Մեծ Բրիտանիայի պաշտպանության նախարարը հրաժարական է տվել
Քաղաքականություն
11.06.2026 | 17:28
Մեծ Բրիտանիայի պաշտպանության նախարար Ջոն Հիլին հրաժարական է տվել։ Երկրի վարչապետ Քիր Սթարմերին ուղղված նամակում Հիլին նշում է, որ Մեծ Բրիտանիան բախվում է սպառնալիքների նոր դարաշրջանի, որը պահանջում է պաշտպանության ոլորտում նոր դարաշրջան և լրացուցիչ ներդրումներ։
«Այդ ժամանակից ի վեր դուք չեք կարողացել, իսկ ֆինանսների նախարարությունը չի ցանկացել տրամադրել այն ռեսուրսները, որոնք երկրին անհրաժեշտ են աճող սպառնալիքների ժամանակաշրջանում իրեն պաշտպանելու համար»,- գրել է Հիլին նամակում։
Նրա խոսքով՝ Սթարմերի կողմից պաշտպանության ներդրումային ծրագրի համար առաջարկված ֆինանսական համաձայնագիրը «շատ քիչ է բավարարում այն ամենին, ինչ անհրաժեշտ է պաշտպանությանն ու երկրին այս վտանգավոր ժամանակահատվածում»։
«Առանց ներկայիս մարտահրավերների մասշտաբին համապատասխանող պաշտպանության ներդրումային ծրագրի՝ ես ստիպված եմ որոշումներ կայացնել, որոնք կնվազեցնեն մեր զինված ուժերի պատրաստվածությունը, կմեծացնեն զինծառայողների համար ռիսկը գործողությունների ընթացքում և, հնարավոր է, երկիրը կդարձնեն ավելի քիչ անվտանգ»,- շեշտել է նա։
Հիլիի խոսքով՝ ծրագիրը լրացուցիչ ֆինանսավորման հատկացումը հետաձգել է 2030 թվականից հետո, մինչդեռ մարտական պատրաստության արագացման անհրաժեշտությունը չափազանց կարևոր է հաջորդ երկու տարիների ընթացքում։
Ջոն Հիլին Մեծ Բրիտանիայի ՊՆ-ն ղեկավարում է 2024 թվականի հուլիսից։ Պաշտպանության նախարարի պաշտոնում նա պարբերաբար հանդես է եկել Ուկրաինային ռազմական օգնության ավելացման և արագացման օգտին, այդ թվում՝ հակաօդային պաշտպանության համակարգերի մատակարարման, ինչպես նաև աջակցել է պատերազմից հետո երկրում բրիտանական զորքեր տեղակայելու գաղափարին։
Թարգմանությունը՝ Էմմա Չոբանյանի
