10.06.2026 | 23:29
Հունիսի 7-ին կայացած ԱԺ ընտրությունները աննախադեպ էին. «Նոր ուժ»-ի հայտարարությունը
Էրդողանը հայտարարել է, որ Իսրայելի հարձակումները Սիրիայի և Լիբանանի վրա սպառնում են նաև Թուրքիային
Քաղաքականություն
10.06.2026 | 20:44
Թուրքիայի նախագահ Ռեջեփ Թայիփ Էրդողանը չորեքշաբթի հայտարարել է, որ Իսրայելի հարձակումները Սիրիայի և Լիբանանի վրա հասել են այն կետին, երբ արդեն սպառնում են նաև Թուրքիային՝ հավելելով, որ Իսրայելի «ագրեսիան» սպառնալիք է ամբողջ աշխարհի համար և պետք է դադարեցվի, գրում է Reuters-ը։
Նշվում է, թե ՆԱՏՕ-ի անդամ Թուրքիան Իսրայելի կողմից Իրանի, Գազայի և Լիբանանի վրա հարձակումների ամենակոշտ քննադատներից է, որը հայտարարում է, որ Իսրայելը տարածաշրջանային խաղաղության ամենամեծ խոչընդոտն է։ Անկարան դադարեցրել է Իսրայելի հետ ամբողջ առևտուրը և կոչ է արել միջոցներ ձեռնարկել նրա դեմ միջազգային դատարաններում։
«[Իսրայելի վարչապետ Բենիամին] Նեթանյահուի և նրա մարդասպան ցանցի հարձակումները Լիբանանի և Սիրիայի վրա խնդիրը հասցրել են այն կետին, երբ այն սպառնում է նաև Թուրքիային»,- ասել է Էրդողանը իշխող «Արդարություն և զարգացում» խմբակցության պատգամավորներին և հավելել, որ Անկարայի անվտանգությունը կապված է այս երկու երկրների անվտանգության հետ։
Էրդողանը նաև ասել է, որ Իսրայելը գլխավորում է աֆրիկյան երկրները և Միջերկրական ծովը ապակայունացնելու «խորամանկ ջանքերը»՝ էթնիկապես բաժանված Կիպրոս կղզում «անհամաձայնության կրակ» վառելով։
«Այս փոքր կազմավորումները, որոնց հավակնությունները զգալիորեն գերազանցում են իրենց չափերը, նստել են Իսրայելի չարագործ նավակը, ստանձնել սիոնիստական ենթակապալառուների դերը և հետապնդում են որոշ անհույս երազանքներ Արևելյան Միջերկրական ծովում։ Ոչ ոք չպետք է արկածախնդրության հետևից ընկնի։ Ես ուզում եմ, որ բոլորը իմանան․ եթե Արևելյան Միջերկրական ծովում խախտվեն Թուրքիայի և կիպրոսցի թուրքերի իրավունքները, մեր պատասխանը կլինի շատ հստակ և շատ ուժեղ»,- հայտարարել է Էրդողանը։
Նա նաև համաշխարհային տերություններին կոչ է արել ավելի հստակ դիրքորոշում ընդունել Իսրայելի նկատմամբ՝ ասելով, որ նրան քաջալերում է «միջազգային հանրության լռությունը»։
«Իսրայելին օրենքի գերակայության սահմաններ վերադարձնելը դարձել է ոչ միայն որոշակի երկրների, այլև ամբողջ մարդկության համատեղ պարտականությունը»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
