Ուկրաինական ԱԹՍ-ները հարձակվել են Վոլգոգրադի վրա. հրդեհվել է «Լուկօյլ»-ի գործարանը

Վոլգոգրադի մարզի Վոլժսկի քաղաքում սինթետիկ մանրաթելերի գործարանի վրա ուկրաինական անօդաչուների հարձակման հետևանքով մեկ մարդ է զոհվել, հայտնում է մարզի նահանգապետ Անդրեյ Բոչարովի, գրում է Meduza-ն։

Մահացածը 60-ամյա տղամարդ է։ Վիրավորվել է նաև 55-ամյա կին, որը ծանր վիճակում հոսպիտալացվել է։

Ուկրաինական անօդաչու թռչող սարքերը հարձակվել են նաև Վոլգոգրադի վրա: Նահանգապետը հայտնել է, որ քաղաքի հյուսիս-արևելքում գտնվող Կրասնոօկտյաբրսկի շրջանի Վերշինինա փողոցում բնակելի շենք է վնասվել: Մեկ մարդ վիրավորվել է, նա տեղում բժշկական օգնություն է ստացել:

Բոչարովը հայտնել է, որ անօդաչու թռչող սարքի բեկորները հրդեհներ են առաջացրել Վոլժսկիի քիմիական գործարանում և Վոլգոգրադի հարավում գտնվող վառելիքի և էներգետիկայի օբյեկտներում: Կոնկրետ օբյեկտները չեն նշվել: Նահանգապետի տեղեկացմամբ՝ հրդեհները մարվել են:

Ուկրաինական տելեգրամ ալիքները պնդում են, որ Վոլգոգրադում նավթավերամշակման գործարանն է հարձակման ենթարկվել։

Astra ալիքը հաղորդում է, որ «Լուկօյլ-Վոլգոգրադնեֆտեպերերաբոտկա» գործարանը հրդեհվել է։ Այն նախկինում մի քանի անգամ հարձակման էր ենթարկվել. 2025 թվականի աշնանը ժամանակավորապես դադարեցրել էր գործունեությունը հարձակումից հետո:

Astra-ն նշում է, որ սա գործարանի վրա առնվազն տասներորդ հարձակումն է: Նահանգապետն իր հայտարարության մեջ չի հիշատակում «Լուկօյլ» նավթավերամշակման գործարանում հրդեհի մասին։

Թարգմանությունը՝ Էմմա Չոբանյանի