Երևանը ոչ պաշտոնապես հայտնել է ՌԴ-ից որոշ դիտորդների անցանկալիության մասին. Զախարովա

Հայաստանը ոչ պաշտոնապես տեղեկացրել է հունիսին կայանալիք ընտրությունների դիտորդական առաքելության ցուցակներում Ռուսաստանի որոշ քաղաքացիների ընդգրկելու անցանկալիության մասին։ Այս մասին այսօր ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Ռուս դիտորդների ցուցակներն ուղարկվել են հավատարմագրման համար սահմանված ընթացակարգերին համապատասխան։ Ամեն ինչ արվել է հայկական կողմի պահանջի համաձայն։ Ցավոք, մեր հայ գործընկերներն իսկապես ոչ պաշտոնապես տեղեկացրել են առաքելության կազմում Ռուսաստանի որոշ քաղաքացիների  ընդգրկելու անցանկալիության մասին։ Նրանց թվում են Պետդումայի երեք պատգամավորներ և Կարաչայ-Չերքեզիայի Հանրապետության ընտրական հանձնաժողովի ներկայացուցիչը։ Մենք խնդրել ենք պատճառներ և որոշակի արձագանք սրա վերաբերյալ։ Մենք պաշտոնական պատասխան չենք ստացել Երևանից, այդ թվում՝ այս որոշման դրդապատճառների վերաբերյալ»,- պնդել է նա։

Զախարովայի խոսքով՝ Մոսկվան  որևէ տեղեկություն չունի այն մասին, թե ինչով կարող էին այս անձինք «նեղացնել» Հայաստանին։

«Ես իրատեսական պատասխաններ չունեմ։ Անկեղծ ասած, չեմ կարող պատկերացնել, թե ինչ են արել Ռուսաստանի այս քաղաքացիները պաշտոնական Երևանին, որ նրանց մուտքը թույլ չեն տալիս։ Կարող եմ միայն ենթադրել, որ դա կարող է պայմանավորված լինել նրանով, որ նրանք գտնվում են Եվրամիության պատժամիջոցների ցանկում, և սա պաշտոնական Երևանի կողմից ԵՄ ղեկավարների առջև խոնարհվելու մի տեսակ դրսևորում է»,- նշել է նա։

Թարգմանությունը՝ Էմմա Չոբանյանի