ԵՄ-ն կանչել է Բրյուսելում ՌԴ դեսպանին՝ Կիևը լքելու վերաբերյալ դիվանագետներին ուղղված Մոսկվայի կոչից հետո

Եվրամիությունը կանչել է Բրյուսելում Ռուսաստանի այն բանից հետո, երբ Մոսկվան օտարերկրյա դիվանագետներին կոչ է արել լքել Կիևը՝ Ուկրաինայի մայրաքաղաքի վրա ևս մեկ խոշոր հարձակման սպառնալիքի ֆոնին։ Օտարերկրյա քաղաքացիներին և դիվանագետներին սպառնալն «անընդունելի սրացում է», հայտարարել է ԵՄ դիվանագիտության ղեկավար Կայա Կալլասի մամուլի քարտուղարը, գրում է DPA գործակալությունը։

Նա ասել է, որ Ուկրաինայում ԵՄ դիվանագիտական ​​առաքելությունը կմնա Կիևում։

Ռուսաստանը մայիսի 25-ին սպառնացել էր Կիևի վրա ևս մեկ զանգվածային ռմբակոծություն սկսել՝ պատերազմի սկզբից ի վեր Ուկրաինայի մայրաքաղաքի վրա իրականացված ամենամեծամասշտաբ հարձակումից մեկ օր անց։ ՌԴ ԱԳՆ հայտարարության մեջ կոչ էր արվում օտարերկրյա դիվանագետներին հնարավորինս շուտ լքել Կիևը՝ նշելով, որ ռուսական զինված ուժերը համակարգված կերպով կհարվածեն քաղաքում գտնվող ռազմական օբյեկտներին և «հրամանատարական կենտրոններին»։

Ուկրաինայի ռազմաօդային ուժերի տվյալներով՝ շաբաթավերջին Ռուսաստանը ռմբակոծել է Կիևի շրջանը 600 անօդաչու թռչող սարքերով և 90 հրթիռներով։ Վնասված վայրերի թվում են բնակելի շենքեր, բիզնես կենտրոններ, ջրամատակարարման կայան և թանգարաններ։

Ուկրաինայի իշխանությունները հայտնել են Կիևի տարածքում երկու մահվան դեպքի մասին, իսկ նախագահ Վլադիմիր Զելենսկին հայտնել է, որ վիրավորվել է 87 մարդ, այդ թվում՝ երեք անչափահաս։

Ռուսաստանի պաշտպանության նախարարությունը հաստատել է նոր «Օրեշնիկ» միջին հեռահարության հրթիռի օգտագործումը, որը հատկապես վախեցնող է իր ավերիչ ուժի ու Եվրոպայի մեծ մասում թիրախների հարվածելու ունակության պատճառով։

Թարգմանությունը՝ Էմմա Չոբանյանի