10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
Ադրբեջանն իրական շահագրգռվածություն է ցուցաբերում՝ փակելու Հայաստանի հետ հակամարտության էջը. Բայրամով
Քաղաքականություն
19.05.2026 | 14:27
Ադրբեջանի և Հայաստանի միջև սկսված կարգավորման գործընթացն ամուր հիմք է ստեղծում տարածաշրջանային ինտեգրման և փոխշահավետ համագործակցության համար։ Այս գործընթացը կարևոր քայլ է խաղաղության ամրապնդման և տնտեսական կապերի զարգացման գործում։ Այս մասին հայտարարել է Ադրբեջանի ԱԳ նախարար Ջեյհուն Բայրամովը՝ ելույթ ունենալով «Քաղաքները փոխկապակցվածության կենտրոնում. քաղաքային վերականգնում և տարածաշրջանային համագործակցություն» միջոցառմանը, որը տեղի է ունեցել Բաքվում Համաշխարհային քաղաքային ֆորումի (WUF13) 13-րդ նստաշրջանի շրջանակում:
«Երկարատև հակամարտության ավարտից և Ադրբեջանի ինքնիշխանության ու տարածքային ամբողջականության լիակատար վերականգնումից հետո տարածաշրջանը տարիների անկայունությունից անցնում է խաղաղության և համագործակցության իրական հնարավորությունների»,- հայտարարել է ադրբեջանցի պաշտոնյան։
Ըստ Բայրամովի՝ «ազատագրված տարածքներում» մոտավորապես 15 միլիարդ դոլար ներդնելով՝ Ադրբեջանը ցույց է տալիս տարածաշրջանում հակամարտության էջը փակելու իր անկեղծ հետաքրքրությունը։
Նա նաև ասել է, որ 2025 թվականի օգոստոսին ստորագրված Վաշինգտոնի հռչակագիրը հիմք է դրել TRIPP նախագծին, որը «ոչ միայն կապահովի անխափան բազմամոդալ կապը Ադրբեջանի մայրցամաքային մասի և Նախիջևանի Ինքնավար Հանրապետության միջև, այլև կստեղծի նոր ռազմավարական կապ Ասիայի և Եվրոպայի միջև՝ երկաթուղիների, մայրուղիների, էներգետիկ խողովակաշարերի, էլեկտրահաղորդման գծերի և օպտիկամանրաթելային մալուխների միջոցով»։
Բայրամովը նաև նշել է, թե Հորադիզ-Աղբենդ երկաթուղին ու նոր Կարս-Իգդիր-Դիլուջու գիծը կլրացնեն, այսպես կոչված, «Զանգեզուրի միջանցքը» և կամրապնդեն Ասիայի ու Եվրոպայի միջև տրանսպորտային կապերը։
Թարգմանությունը՝ Էմմա Չոբանյանի
