17.08.2026 | 10:46
Թավրիզ–Երևան չվերթները երկու տարվա դադարից հետո կվերականգնվեն
Իրանը հինգ պայման է առաջադրել ԱՄՆ-ին՝ բանակցությունները վերսկսելու համար
Քաղաքականություն
13.05.2026 | 11:16
Իրանը չի մասնակցի ԱՄՆ-ի հետ բանակցությունների երկրորդ փուլին՝ առանց վստահության ամրապնդման հինգ պայմանների կատարման։ Այս մասին իրանական Fars-ին հայտնել է տեղեկացված աղբյուրը։
Ըստ աղբյուրի՝ Իրանի կողմից հայտարարված նախապայմաններն ԱՄՆ-ի հետ ցանկացած բանակցություն սկսելու համար վստահության ամրապնդման նվազագույն երաշխիքներն են։
Ամերիկյան կողմի համար Իրանի առաջադրած հինգ նախապայմանների թվում են՝ բոլոր ճակատներում, մասնավորապես՝ Լիբանանում, պատերազմի դադարեցումը, հակաիրանական պատժամիջոցների վերացումը, Իրանի միջոցների ապասառեցումը, պատերազմական վնասների փոխհատուցումը և Իրանի ինքնիշխանության ընդունումը Հորմուզի նեղուցի նկատմամբ։ Այս պայմանները սահմանվել են բացառապես երկխոսության գործընթացին վերադառնալու համար վստահության նվազագույն մակարդակ ստեղծելու շրջանակում, և Թեհրանը կարծում է, որ առանց այս կետերի գործնական իրականացման հնարավոր չի լինի նոր բանակցություններ սկսել։
Fars-ի տեղեկություններով՝ Իրանն այս հինգ նախապայմաններն առաջադրել է՝ ի պատասխան ԱՄՆ-ի 14 կետանոց առաջարկի։ Աղբյուրների պնդմամբ՝ ամերիկյան առաջարկները լիովին միակողմանի էին և նախատեսված էին Վաշինգտոնի շահերը սպասարկելու համար, և դրանցով «ամերիկացիները փորձում էին բանակցությունների միջոցով հասնել այն նպատակներին, որոնց չէին հասել պատերազմում»։
ԱՄՆ նախագահ Դոնալդ Թրամփը հայտարարել էր, որ Իրանի պատասխանը ստացել է մայիսի 10-ին։ Նա ասել է, որ իրեն դուր չեն գալիս Իրանի առաջարկները՝ դրանք «անընդունելի» որակելով։ Թրամփը, սակայն, չի մանրամասնել, թե ինչ է առաջարկում Իրանը։
Թարգմանությունը՝ Էմմա Չոբանյանի
