Թրամփը հայտարարել է, որ Իրանի հետ գործարքը «շատ հնարավոր է»

ԱՄՆ նախագահ Դոնալդ Թրամփը հայտարարել է, որ Վաշինգտոնը վերջին 24 ժամվա ընթացքում «շատ լավ բանակցություններ» է ունեցել Իրանի հետ, սակայն «վերջնաժամկետ չկա», թե երբ է ակնկալվում Թեհրանից պատասխան պատերազմը դադարեցնելու ԱՄՆ առաջարկի վերաբերյալ, գրում է CNN-ը։

«Մենք հիմա լավ դիրքում ենք, և պետք է ստանանք այն, ինչ ուզում ենք։ Եթե դա չանենք, ստիպված կլինենք ևս մեկ մեծ քայլ անել։ Բայց նրանք ուզում են գործարք կնքել։ Շատ հնարավոր է, որ մենք գործարք կկնքենք»,- լրագրողներին ասել է Թրամփը։

Վերջնաժամկետի մասին հարցին ի պատասխան՝ Թրամփը նշել է անորոշ ժամանակացույցի մասի․։ «Դա տեղի կունենա, բայց վերջնաժամկետ չկա»։

Թրամփը նաև պնդել է, թե Իրանը համաձայնել է իր գլխավոր պահանջին՝ չունենալ միջուկային զենք։

«Իրանը չի կարող միջուկային զենք ունենալ, և նրանք չեն ունենա։ Նրանք համաձայնել են դրան՝ ի թիվս այլ բաների»,- ասել է ԱՄՆ նախագահը, չնայած դեռևս որևէ ապացույց չկա այն մասին, թե Իրանն ինչի է համաձայնվել կամ ինչի չի համաձայնվել։

Ավելի վաղ Axios-ը, հղում անելով Սպիտակ տան աղբյուրներին, հայտնել էր, որ Իրանը և Միացյալ Նահանգները մոտ են «մեկ էջանոց փոխըմբռնման հուշագրի» ստորագրմանը, որը կծառայի որպես կողմերի միջև խաղաղության համաձայնագիր և հետագա բանակցությունների հիմք կդնի։ Մասնավորապես, փաստաթուղթը նախատեսում է 30-օրյա բանակցություններ, որոնց ընթացքում կողմերը, ինչպես սպասվում է, կհասնեն լրացուցիչ համաձայնությունների Հորմուզի նեղուցի, Իրանի միջուկային ծրագրի և ԱՄՆ պատժամիջոցների վերաբերյալ։ Սպիտակ տունն ակնկալում է, որ Իրանը հուշագիրը կստորագրի մինչև այս շաբաթվա վերջ։

Իրանի ԱԳ նախարարության խոսնակը հայտարարել է, որ ԱՄՆ-ի կողմից ներկայացված առաջարկը «քննարկվում է», և որ Թեհրանի պատասխանը կհաղորդվի միջնորդ Պակիստանին՝ «տեսակետները վերջնականապես ձևակերպելուց հետո»։

Թարգմանությունը՝ Էմմա Չոբանյանի