28.04.2026 | 23:24
Երևանում երթևեկության փոփոխություն կկատարվի
Թուրքիայում մայիսի 1-ի տոնակատարություններից առաջ տասնյակ մարդիկ են ձերբակալվել
Քաղաքականություն
28.04.2026 | 21:29
Մայիսի 1-ին նշվող Աշխատավորների միջազգային օրվան ընդառաջ՝ Ստամբուլում ձերբակալվել է շուրջ 40 մարդ, այդ թվում՝ լրագրողներ, արհմիությունների անդամներ և ընդդիմադիր գործիչներ, գրում է Turkish minute-ը։
Ստամբուլի դատախազությունը լրագրողներին հայտնել է, որ 62 անձի նկատմամբ կալանքի և խուզարկության օրդեր է տրվել, որոնցից 46-ը համարվել են «հավանական հարձակումներ իրականացներ»։ Նշվում է, որ 46-ից 39-ը ձերբակալվել է Ստամբուլում և մոտակա Քոջաելիում։
Թուրքիայի լրատվամիջոցների և իրավունքի ուսումնասիրությունների (MLSA) կազմակերպությունը, որը մամուլի և իրավական ազատության մարմին է, հայտարարել է, որ ոստիկանական խուզարկություններ են իրականացվել փաստաբանի տանը և ընդդիմադիր «Özgür Gelecek» ու «Yeni Demokrasi» թերթերի խմբագրություններում, որտեղ դռները «կոտրվել են»։
Փաստաբան Սերհաթ Ալանի համաձայն, որի տունը խուզարկվել է, «նրան ներկայացվել են 46 անձի վերաբերյալ կալանքի փաստաթղթեր», նշել է MLSA-ն։
«Քանի որ այս գործը ենթակա է 24-ժամյա գաղտնիության կարգադրության, փաստաբանների հետ կապվելու սահմանափակումներ են դրվել»,- հավելել է նա։
Քրդամետ «Ժողովուրդների հավասարություն և ժողովրդավարություն» կուսակցությունը (DEM), որը Թուրքիայի խորհրդարանի երրորդ խոշորագույն խմբակցությունն ունի, դատապարտել է կատարվածը, որն անվանել է «ձախերի և սոցիալիստների, ինչպես նաև ուսանողական կազմակերպությունների դեմ ուղղված գործողություններ» մայիսի 1-ից առաջ։
«Բազմաթիվ ընկերներ են ձերբակալվել»,- ասվում է հայտարարության մեջ՝ հավելմամբ, որ գործողությունները նպատակ ունեին «նեղացնել ժողովրդավարական քաղաքականության տարածքը», և որ դրանք «կխորացնեն սոցիալական լարվածությունը»։
Մայիսի 1-ին ամեն տարի Թուրքիայում մեծ ոստիկանական ուժեր են տեղակայվում, իսկ Ստամբուլի կենտրոնական Թաքսիմ հրապարակի շուրջը մեծ տարածք է փակվում տոնին նախորդող երեկոյան։
Անցյալ տարի բողոքի ցույցերը տեղափոխվել էին քաղաքի Քադըքյոյ թաղամաս, որտեղ ձերբակալվել է ավելի քան 400 մարդ։
Թարգմանությունը՝ Էմմա Չոբանյանի
