02.07.2026 | 17:23
Նիկոլ Փաշինյանի ճեպազրույցը՝ ՈՒՂԻՂ
Ինդոնեզիայում գնացքի վթարի հետևանքով զոհվել է 14 մարդ, ավելի քան 80-ը՝ վիրավորվել
Քաղաքականություն
28.04.2026 | 13:17
Ինդոնեզիայում գիշերը երթևեկող գնացքը բախվել է մեկ այլ՝ կանգնած գնացքին, որի հետևանքով զոհվել է 14 մարդ, տասնյակները վիրավորվել են: Նախագահ Պրաբովո Սուբիանտոն հրամայել է հետաքննություն սկսել։ Պաշտոնյաները ավարտել են գրեթե 12-ժամյա փրկարարական աշխատանքները մայրաքաղաք Ջակարտայից արևելք գտնվող Բեկասի Թիմուր կայարանի մոտակայքում, որտեղ բախումից հետո անձնակազմը բացել է վնասված վագոնները, գրում է Le Monde-ը:
Պետական երկաթուղային KAI օպերատորն առավոտյան հայտարարել է, որ զոհերի թիվը հասել է 14-ի: Եվս 84 մարդ բժշկական օգնության կարիք է ունեցել, ասվում է հաղորդագրության մեջ՝ առանց նշելու, թե քանիսն են դեռևս մնում հիվանդանոցներում:
KAI-ի խոսնակ Ֆրանկոտո Վիբովոյի խոսքով՝ տաքսին, ըստ երևույթին, բախվել է գնացքի երկաթուղային անցման ժամանակ, ինչի հետևանքով այն կանգ է առել գծերի վրա, որտեղ տեղի է ունեցել բախումը։
Agence France-Presse-ի լրագրողը դեպքի վայրում ականատես է եղել, թե ինչպես են մարդկանց դուրս բերում փլատակներից ու տանում սպասող շտապօգնության մեքենաներ։ Զինվորականները, հրշեջ ծառայությունը, ազգային որոնողական-փրկարարական գործակալությունը և Կարմիր խաչը օգնել են հաջորդած զանգվածային տարհանման աշխատանքներին։
Նախագահ Պրաբովո Սուբիանտոն այցելել է Բեկասիի հիվանդանոցում գտնվող հիվանդներին, ցավակցություն հայտնել մահացածների հարազատներին և ասել, որ հրամայել է «անհապաղ հետաքննություն»։ Նա նաև հանձնարարել է Բեկասիում էստակադա կառուցել։
Թարգմանությունը՝ Էմմա Չոբանյանի
