Թբիլիսիում ԵՄ դեսպանը կանչվել է Վրաստանի ԱԳՆ

Վրաստանի արտաքին գործերի նախարար Մակա Բոճորիշվիլին հանդիպել է Վրաստանում ԵՄ դեսպան Պավել Գերչինսկիի հետ։ Դիվանագետը կանչվել է նախկինում արված հայտարարությունների կապակցությամբ։ Բրյուսելում ունեցած ելույթում Պավել Գերչինսկին հայտարարել էր, որ Վրաստանը գտնվում է խաչմերուկում, և «առաջիկա շաբաթների և ամիսների ընթացքում կայացված որոշումները կհստակեցնեն՝ արդյո՞ք Վրաստանը կմիանա եվրոպական երկրների ընտանիքին, թե՞ կվերադառնա իր մութ անցյալ»։

Ըստ Վրաստանի ԱԳՆ-ի՝ դեսպանի և նախարարի միջև հանդիպումից հետո Բոճորիշվիլին ընդգծել է, որ Բրյուսելի ներկայիս քաղաքականությունը Վրաստանի նկատմամբ, ձեռնարկված քայլերը և արված հայտարարությունները խաթարում են կողմերի միջև վստահությունը, վնասում Վրաստանի ու Եվրամիության միջև գործընկերությանը։

«Ցավոք, Բրյուսելի գործողությունները կարելի է գնահատել միայն որպես վրացական հասարակության հետագա բևեռացմանը և արմատական ​​օրակարգի խրախուսմանն ուղղված քայլեր։ Նախարարը նշել է, որ Վրաստանի իշխանությունները մշտապես արտահայտել են կառուցողական երկխոսության իրենց պատրաստակամությունն ու Եվրամիությունից ակնկալում են արդար և հարգալից հարաբերություններ»,- ասվում է Վրաստանի արտաքին գործերի նախարարության հայտարարության մեջ։

Պավել Գերչինսկիի հայտարարությունը քննադատության է արժանացել իշխող կուսակցության կողմից: «Վրացական երազանքի» գլխավոր քարտուղար, Թբիլիսիի քաղաքապետ Կախա Կալաձեն հայտարարել էր, որ Վրաստանը չի շեղվել եվրոպական ուղուց, մինչդեռ կուսակցության նախագահ Իրակլի Կոբախիձեն ասել էր, որ «[դեսպանը] սպառնում է վրաց ժողովրդին քաղաքացիական պատերազմով և աղքատացմամբ, որ դա նրա ուղղակի սպառնալիքն է, և տեղին կլինի նրան կանչել ԱԳՆ»:

Վերջին տարիներին իշխող «Վրացական երազանք» կուսակցությունը մի շարք օրենքներ է ընդունել, որոնք ԵՄ առաջնորդները համարել են Վրաստանի եվրոպական ձգտումներին հակասող: Այս միջոցառումները զգալիորեն սահմանափակել են անկախ լրատվամիջոցների և ոչ կառավարական կազմակերպությունների ֆինանսավորումը և խստացրել ցույցերի համար կանոնակարգերը:

Թարգմանությունը՝ Էմմա Չոբանյանի