26.06.2026 | 00:17
Իսրայելի ԱԳ նախարարը նախատեսում է կառավարությանը առաջարկել Հայոց ցեղասպանությունը ճանաչելու բանաձև
Ըմբշամարտի ԵԱ․ Սլավիկ Գալստյանը և Գասպար Տերտերյանը՝ բրոնզե մեդալակիրներ. ՏԵՍԱՆՅՈՒԹ
22.04.2026 | 21:16
Հայաստանի ներկայացուցիչներ Սլավիկ Գալստյանը (67 կգ) և Գասպար Տերտերյանը (72 կգ) բրոնզե մեդալակիր դարձան Ալբանիայի մայրաքաղաք Տիրանայում ավարտին մոտեցող հունահռոմեական ոճի ըմբշամարտի Եվրոպայի առաջնությունում։
Սլավիկ Գալստյանը բրոնզե մեդալի համար գոտեմարտում 5:3 հաշվով պարտության մատնեց ուկրաինացի Ալեքսանդր Հրուշինին, իսկ Գասպար Տերտերյանը բրոնզե մեդալը վիճարկեց բելառուս Ալեքսանդր Լիավոնչուկի հետ ու հաղթեց 1։1 հաշվով։
29-ամյա Գալստյանը Եվրոպայի առաջնության բրոնզե մեդալակիր դարձել էր նաև 2021 և 2022 թվականներին։ Նա նաև աշխարհի առաջնության կրկնակի բրոնզե մեդալակիր է։
20-ամյա Տերտերյանը նորամուտը նշեց մեծահասակների Եվրոպայի առաջնությունում։
10 ըմբիշով մրցավայր մեկնած հունահռոմեական ոճի ըմբշամարտի Հայաստանի հավաքականը Եվրոպայի առաջնությունում ելույթն ավարտեց 1 ոսկե, 1 արծաթե ու 3 բրոնզե մեդալով։ Ավելի վաղ Մալխաս Ամոյանը (77 կգ) 5-րդ տարին անընդմեջ դարձել էր Եվրոպայի չեմպիոն, Սուրեն Աղաջանյանն (60 կգ) արժանացել էր արծաթե մեդալի, իսկ Կարեն Ասլանյանը (63 կգ) կարիերայի չորրորդ բրոնզե մեդալն էր նվաճել Եվրոպայի առաջնությունում։
Հայաստանի հավաքականի կազմում ԵԱ-ին մասնակցեցին նաև Մանվել Խաչատրյանը (55 կգ), Սամվել Գրիգորյանը (82 կգ), Գևորգ Թադևոսյանը (87 կգ), Հայկ Խլոյանը (97 կգ) և Ալբերտ Վարդանյանը (130 կգ):
