10.04.2026 | 22:41
Ապրիլի 13-ին Հայաստանի մի շարք հասցեներում էլեկտրաէներգիայի անջատումներ կլինեն
«Հուշանվեր» թղթադրամներով խարդախություն Շենգավիթում․ ոստիկանների բացահայտումները. ՆԳՆ
Հասարակություն
10.04.2026 | 19:42
Շենգավիթ վարչական շրջանում համայնքային ոստիկանները բացահայտել են «հուշանվեր» գրառմամբ կեղծ թղթադրամներով իրականացված խարդախությունների շարք․ ձերբակալվել է 37-ամյա տղամարդ։
Ապրիլի 6-ին՝ ժամը 23։23-ին, օտարերկրյա առաքիչը ոստիկանությանը հայտնել է, որ Եղբարության փողոցում երկու երիտասարդների փոխանցած 20 հազար դրամանոցը «հուշանվեր» գրառմամբ է եղել, և գումարը չվճարելով՝ նրանք հեռացել են։
Հաջորդ օրը՝ ապրիլի 7-ին՝ գիշերը ժամը 2։37-ին, մեկ այլ առաքիչ Թադևոսյան փողոցում ստացել է երկու հատ 20 հազարանոց, որոնք նույնպես «հուշանվեր» էին։
Նույն օրը՝ ժամը 16։34-ի սահմաններում, ևս մեկ դեպք է գրանցվել․ ժամացույցի առաքման համար օտարերկրյա առաքիչը ստացել է կեղծ թղթադրամներ և նույնիսկ վերադարձրել 7 հազար դրամ մանրը՝ ուշ նկատելով խարդախությունը։
Նախաձեռնված քրեական վարույթի շրջանակում Շենգավիթի ոստիկանները իրականացրել են օպերատիվ-հետախուզական միջոցառումներ և եկել այն եզրակացության, որ երեք դեպքերն էլ նույն անձի ձեռքի գործն են։ Վարկածը հաստատվել է։
Պարզվել է, որ խարդախությունները կատարել է Մանթաշյան փողոցի 37-ամյա բնակիչը։ Ապրիլի 8-ի առավոտյան նա ձերբակալվել է, իսկ խուզարկությամբ հայտնաբերվել են «հուշանվեր» գրառմամբ թղթադրամներ։
Տղամարդը ներկայացվել է նախաքննական մարմին։ Դեպքի հանգամանքները պարզվում են։
