31.03.2026 | 19:38
Վարչական ռեսուրս, ճնշումներ, ընտրակաշառք․ «Անկախ դիտորդի» դիտորդության արդյունքները
Փաշինյանին հարվածել փորձողին կալանավորելու միջնորդություն է ներկայացվել․ ՏԵՍԱՆՅՈՒԹ
Հասարակություն
31.03.2026 | 16:19
Եկեղեցու միջադեպի մասնակիցներից Դավիթ Մինասյանին, որին վերագրվում է Փաշինյանին հարվածելու փորձի դրվագը, կալանավորելու միջնորդություն է ներկայացվել։ Այս մասին Երևան քաղաքի քննչական վարչության շենքի դիմաց լրագրողներին հայտնեց պաշտպան Լուսինե Մարտիրոսյանը։
Մինասյանին տեղափոխել են Երևան քաղաքի ընդհանուր իրավասության քրեական դատարանի Կենտրոն նստավայր։
«Այս պահին դեռ չգիտենք՝ ում է մակագրվելու միջնորդությունը, ժամը չգիտենք, լրացուցիչ ձեզ կտեղեկացնենք»,- ասաց փաստաբանը։
Հիշեցնենք, որ կիրակի Սուրբ Աննա եկեղեցում պատարագի ժամանակ, որին մասնակցում էր նաև վարչապետ Նիկոլ Փաշինյանը, միջադեպ էր տեղի ունեցել։ Այն պահին, երբ Փաշինյանի անվտանգության աշխատակիցները ճանապարհ էին բացում, որպեսզի նա դուրս գար, մի երիտասարդ նախ ընդդիմացավ, ապա փորձեց ձեռքով հարվածել վարչապետին։ Այդ երիտասարդը 18-ամյա Դավիթ Մինասյանն է, որը մեղադրվում է խուլիգանության և պաշտոնատար անձի օրինական ծառայողական կամ քաղաքական գործունեությանը միջամտելու համար։
Միջադեպի մյուս մասնակիցները՝ նրա եղբայր Միքայել Մինասյանն ու Գևորգ Գևորգյանն ազատ են արձակվել։ Վերջինի նկատմամբ կիրառվել է 5 մլն դրամ գրավ ու բացակայելու արգելք, իսկ Միքայել Մինասյանի նկատամամբ՝ միայն բացակայելու արգելք։ Նա մեղադրվում է այդ գործողություններին աջակցելու համար, իսկ Գևորգյանն այդ ամենը կազմակերպելու համար։ Գևորգ Գևորգյանը հերքել է միջադեպի կազմակերպված լինելն ու հայտնել, որ չի ընդունում ներկայացված մեղադրանքները։ Միքայել Մինասյանն էլ միայն նշել է, որ լավ է և իրեն լավ են վերաբերվել։
Արփի Հակոբյան
