27.07.2026 | 22:59
Սևանա լճի մակարդակը հուլիսի 20-26-ը հունվարի 1-ի ցուցանիշից բարձր է 57 սմ-ով
ԱԴԾ-ն Մոսկվայում Մեծ Բրիտանիայի դեսպանատան քարտուղարին մեղադրել է «հետախուզական գործունեության» մեջ․ նա կվտարվի երկրից
Քաղաքականություն
30.03.2026 | 13:48
ՌԴ-ում Մեծ Բրիտանիայի դեսպանատան երկրորդ քարտուղար Յանսե վան Ռենսբուրգ Ալբերտուս Ջերարդուսի հավատարմագրումը չեղյալ է հայտարարվել, նա պետք է լքի Ռուսաստանը երկու շաբաթվա ընթացքում։ Այս մասին հաղորդում է Ինտերֆաքս-ը՝ հղում անելով Անվտանգության դաշնայի ծառայության (ԱԴԾ) հայտարարությանը, գրում է Meduza-ն։
Հատուկ ծառայության տվյալներով՝ Յանսե վան Ռենսբուրգը «դիտավորյալ կեղծ տեղեկություններ է տրամադրել Ռուսաստան մուտք գործելիս՝ այդպիսով խախտելով Ռուսաստանի օրենսդրությունը»։ Ավելին, ԱԴԾ-ն դիվանագետի աշխատանքում հայտնաբերել է «հետախուզական և դիվերսիոն գործունեության ապացույցներ, որոնք սպառնում են Ռուսաստանի անվտանգությանը»։
Ծառայությունը գրանցել է նրա կողմից «զգայուն տեղեկատվության ստացում ռուս տնտեսական փորձագետների հետ ոչ պաշտոնական հանդիպումների ժամանակ»։
ԱԴԾ-ն նաև խորհուրդ է տվել ռուսաստանցիներին «բացասական հետևանքներից, այդ թվում՝ քրեական պատասխանատվությունից խուսափելու համար», ձեռնպահ մնալ բրիտանացի դիվանագետների հետ հանդիպումներից՝ առանց Արտաքին գործերի նախարարության հաստատման, քանի որ «հետախուզության աշխատակիցները կարող են թաքնվել պաշտոնական դիվանագիտական պաշտոնների քողի տակ»։
ՌԴ ԱԳՆ-ն հայտնել է, որ մարտի 30-ին կանչել է Ռուսաստանում Մեծ Բրիտանիայի գործերի ժամանակավոր հավատարմատար Դեյնի Դոլակիյուին, որին «ներկայացրել է խիստ բողոք՝ բացահայտված տեղեկատվության հետ կապված»։
«Մոսկվան չի հանդուրժի չհայտարարագրված բրիտանական հետախուզության աշխատակիցների գործունեությունը Ռուսաստանի տարածքում, և մեր անզիջում դիրքորոշումն այս հարցում կշարունակի ձևակերպվել ազգային անվտանգության շահերին համապատասխան»,- ասվում է հայտարարության մեջ։
Թարգմանությունը՝ Էմմա Չոբանյանի
