ԵՄ առաքելությունը նախազգուշացրել է Կարմիր ծովում հուսիների նոր սպառնալիքի մասին

Եվրամիության Aspides ռազմածովային առաքելությունը նախազգուշացրել է Կարմիր ծովում և Ադենի ծոցի արևելյան հատվածում միջազգային նավագնացության դեմ իրանամետ հուսիների շարժման հարձակումների վտանգի մասին։ Այդ շրջանում գտնվող նավերը կրկին կարող են հայտնվել հարվածների տակ, հայտարարել է առաքելությունը կիրակի՝ մարտի 29-ին, որի շտաբը գտնվում է Հունաստանի Լարիսա քաղաքում։ Տարածաշրջանում գտնվող նավերի ընկերություններին խորհուրդ է տրվում ցուցաբերել հատուկ զգուշություն, փոխանցում է DW-ն։

Նախօրեին հուսիների շարժումը վերսկսել է հրթիռային հարվածները Իսրայելի ուղղությամբ՝ այդպիսով միանալով Իրանի կողմին՝ մեկ ամիս առաջ ԱՄՆ-ի և Իսրայելի կողմից սկսված պատերազմում։ Թեհրանին դաշնակից այս խմբավորումը մարտի 28-ի երեկոյան հայտարարել է, որ հակամարտությանը միանալուց ի վեր արդեն իրականացրել է երկրորդ ավիահարվածը Իսրայելի դեմ։ Հութիների ներկայացուցիչ Յահյա Սարիայի խոսքով՝ Իսրայելի տարածքում «մի շարք կարևոր ռազմական օբյեկտների» ուղղությամբ արձակվել են «հրթիռներ և անօդաչու սարքեր»։ Նույն օրը ավելի վաղ խմբավորումը արդեն մեկ հրթիռ էր արձակել Իսրայելի ուղղությամբ, որը խոցվել էր։

Պատերազմի սկզբից ի վեր Իրանը արգելափակում է Հորմուզի նեղուցը՝ համաշխարհային նավթի և գազի շուկայի համար ռազմավարական կարևոր ուղին։ Արդյունքում էներգակիրների գները կտրուկ աճել են։ Այժմ, Aspides առաքելության գնահատմամբ, վտանգի տակ կարող է հայտնվել նաև Կարմիր ծովով և Ադենի ծոցով նավագնացությունը։ Իսրայելի կամ ԱՄՆ-ի հետ կապված նավերին խորհուրդ է տրվում հնարավորության դեպքում խուսափել այս տարածքով անցնելուց։

Հուսիները նախկինում ևս բազմիցս հարձակվել են Կարմիր ծովում և Ադենի ծոցում առևտրային նավերի վրա։ Այս ջրային տարածքները համարվում են աշխարհի կարևորագույն առևտրային ուղիներից մեկը․ դրանք գտնվում են Աֆրիկայի հյուսիս-արևելքի և Արաբական թերակղզու միջև և հանդիսանում են առանցքային կապող օղակ Միջերկրական ծովի (Սուեզի ջրանցքով) և Հնդկական օվկիանոսի (Բաբ էլ-Մանդեբի նեղուցով) միջև։