Ուկրաինան և Սաուդյան Արաբիան պաշտպանական համագործակցության համաձայնագիր են ստորագրել

Ուկրաինայի և Սաուդյան Արաբիայի պաշտպանության նախարարությունները պաշտպանական համագործակցության վերաբերյալ համաձայնագիր են ստորագրել։ Այս մասին հաղորդում է ՌԲԿ Ուկրաինան։

Ուկրաինայի նախագահ Վլադիմիր Զելենսկին ասել է, որ համապատասխան փաստաթուղթը ստորագրվել է Սաուդյան Արաբիայի թագաժառանգ Մուհամմեդ բին Սալման ալ Սաուդի հետ իր հանդիպումից առաջ։ Համաձայնագիրը հիմք է դնում հետագա պայմանագրերի, տեխնոլոգիական համագործակցության և ներդրումների համար, ինչպես նաև ամրապնդում է Ուկրաինայի միջազգային դերը որպես անվտանգության դոնոր։

Նա նշել է, որ Ուկրաինան պատրաստ է Սաուդյան Արաբիայի հետ համագործակցել կյանքերի պաշտպանությունն ամրապնդելու հարցում։

«Արդեն հինգ տարի է, ինչ ուկրաինացիները պայքարում են նույն ահաբեկչական հարձակումների դեմ, որոնք իրանական ռեժիմն այժմ իրականացնում է Մերձավոր Արևելքում և Պարսից ծոցի տարածաշրջանում։ Դրանք իրականացվում են բալիստիկ հրթիռներով և անօդաչու թռչող սարքերով։ Եվ Սաուդյան Արաբիան ունի մի բան, որով Ուկրաինան հետաքրքրված է։ Այս համագործակցությունը կարող է փոխշահավետ լինել»,- ընդգծել է նա։

Կողմերը նաև քննարկել են Մերձավոր Արևելքում և Պարսից ծոցի տարածաշրջանում ստեղծված իրավիճակը, Ռուսաստանի կողմից Իրանին  ցուցաբերվող օգնությունը, վառելիքի շուկաներում տիրող իրավիճակը և էներգետիկայի ոլորտում հնարավոր համագործակցությունը։

Զելենսկին նախօրեին ժամանել է տարածաշրջան՝ պաշտպանության ոլորտում աջակցության դիմաց Ուկրաինայի անօդաչու թռչող սարքերի դեմ պայքարի փորձն առաջարկելու նպատակով։ Մեկ շաբաթ առաջ նա հայտարարել էր, որ Ուկրաինան պաշտպանական համաձայնագրերի շուրջ բանակցություններ է վարում Մերձավոր Արևելքի երկրների հետ, միաժամանակ առաջարկում է, այսպես կոչված, անօդաչու թռչող սարքերի գործարք Միացյալ Նահանգներին։