02.07.2026 | 20:10
Զելենսկին հայտարարել է, որ Ռուսաստանը պատասխան կստանա Կիևի վրա զանգվածային հարվածի համար
Գերմանիայի ԱԳ նախարարը հայտարարել է, որ ԱՄՆ-ն ու Իրանը ծրագրում են հանդիպել Պակիստանում
Քաղաքականություն
27.03.2026 | 14:43
Գերմանիայի արտաքին գործերի նախարար Յոհան Վադեֆուլը հայտարարել է, որ Միացյալ Նահանգներն ու Իրանը անուղղակի բանակցություններ են վարել, և որ երկու կողմերի ներկայացուցիչները ծրագրում են շուտով հանդիպել Պակիստանում։
«Իմ տեղեկությունների համաձայն՝ եղել են անուղղակի շփումներ, և նախապատրաստություններ են արվել անմիջական հանդիպման համար։ Դա, ըստ երևույթին, շատ շուտով կլինի Պակիստանում։ Ի վերջո, լավ նորություն է, որ այս բանակցությունները կարող են տեղի ունենալ»,- ասել է նա Deutschlandfunk ռադիոյին։
Գերմանացի պաշտոնյայի խոսքով՝ ԱՄՆ պետքարտուղար Մարկո Ռուբիոն, «հնարավոր է, այսօր ավելի մանրամասն անդրադառնա այս հարցին» Ֆրանսիայում կայանալիք G7-ի արտաքին գործերի նախարարների հանդիպման ժամանակ։ Նա հավելել է, որ ԱՄՆ-ը որևէ կոնկրետ խնդրանք չի ներկայացրել Գերմանիային Իրանի պատերազմում օգնության համար, սակայն Գերմանիան աջակցություն է առաջարկել հակամարտությունից հետո։
Վադեֆուլը նաև վերահաստատել է Գերմանիայի պատրաստակամությունը՝ օգնելու Հորմուզի նեղուցում նավագնացության անվտանգությանը պատերազմի ավարտից հետո։
«Ինչպես մենք միշտ ասել ենք՝ այս պատերազմի ավարտից հետո Գերմանիան սկզբունքորեն պատրաստ է քննարկել՝ արդյո՞ք կարող է օգնել Հորմուզի նեղուցում նավագնացության անվտանգությանը։ Բայց մենք նախ պետք է հասնենք այնտեղ»,- հայտարարել է նա։
Ավելի վաղ Պակիստանը հայտնել էր, որ Մերձավոր Արևելքում լարվածությունը մեղմելու անուղղակի բանակցությունների շրջանակում փոխանցում է Միացյալ Նահանգների և Իրանի միջև հաղորդագրությունները, միջնորդում է շփումներին։
Թարգմանությունը՝ Էմմա Չոբանյանի
