27.04.2026 | 10:16
EPC գագաթնաժողովի պատճառով մայիսի 3-5-ին Երևանում կլինեն երթևեկության ժամանակավոր սահմանափակումներ․ ՆԳՆ
Թրամփը բացահայտել է Իրանի «իրական նվերը» ԱՄՆ-ին
Քաղաքականություն
26.03.2026 | 21:19
ԱՄՆ նախագահ Դոնալդ Թրամփը հայտարարել է, որ այս շաբաթվա սկզբին Իրանի կողմից ԱՄՆ-ին տրված առեղծվածային «նվերը» «նավթով լի 10 նավակներ» էին, որոնք հաջողությամբ հատել են Հորմուզի նեղուցը, գրում է CNN-ը։
Այս շաբաթվա սկզբին Թրամփն ասել էր, որ «բարի կամքի դրսևորումը նպաստել է պատերազմը դադարեցնելու դիվանագիտական ջանքերին», չնայած նա զգուշորեն էր խոսում այն մասին, թե իրականում ինչ է դա եղել։
«Դա շատ մեծ նվեր էր, որի արժեքը հսկայական գումար էր։ Ես չեմ պատրաստվում ձեզ ասել, թե ինչ նվեր էր, բայց դա շատ կարևոր մրցանակ էր»,- երեքշաբթի Օվալաձև աշխատասենյակում լրագրողներին ասել էր Թրամփը։
Այսօր նա հայտարարել է, որ ԱՄՆ-ը «շատ էական բանակցություններ» է վարել իրանցի անանուն պաշտոնյաների հետ, և որ նավթատարների անցումը նեղուցով վկայում է, որ բանակցողները լուրջ են։
«Նրանք ասացին՝ «Ցույց տալու համար, որ մենք իրական ենք և հաստատուն, և մենք այնտեղ ենք, մենք ձեզ թույլ կտանք ունենալ նավթով լի ութ նավակ, ութ նավթով լի մեծ նավակ»»,- ասել է Թրամփը՝ հավելելով, որ «նրանք ճիշտ էին և իրական», և նավակները Հորմուզի նեղուցով անցել են Պակիստանի դրոշներով։
Նա հավելել է, որ իրանցիները նաև երկու լրացուցիչ նավակ են ուղարկել՝ «ներողություն խնդրելու իրենց ասածի համար»։ Այս դրվագը, ըստ Թրամփի, ապացուցել է ԱՄՆ-ին, որ «գործ ունենք ճիշտ մարդկանց հետ»։
Հարցին՝ արդյո՞ք կարծում է, որ Իրանը պետք է կարողանա վճար գանձել նեղուցը հատող նավերի համար, Թրամփը պատասխանել է․ «Նրանք չպետք է կարողանան, բայց դա անում են երբեմն»։
Թրամփը նաև հայտարարել է, որ իրանական նավթի պաշարների գրավումը «մեկ տարբերակ է»։
«Ես դա չէի ասի, բայց դա մեկ տարբերակ է»,- ասել է Թրամփը՝ պատասխանելով լրագրողի հարցին նման լուծման հնարավորության մասին։
Նա ենթադրություն է հայտնել, որ Իրանում իրավիճակի լուծումը կարող է նման լինել Վենեսուելայում ստեղծված իրավիճակին, որտեղ ԱՄՆ-ը տապալեց Նիկոլաս Մադուրոյին և սկսեց համագործակցել գործող նախագահ Դելսի Ռոդրիգեսի հետ նավթի և այլ հարցերի շուրջ։
«Մենք շատ լավ ենք աշխատել Վենեսուելայի հետ։ Անշուշտ, մենք միլիարդավոր դոլարներ ենք ստացել։ Եվ, ի դեպ, Վենեսուելան այժմ ավելի լավ վիճակում է, քան երբևէ իր երկրի պատմության մեջ, և կարծես համատեղ ձեռնարկություն լինի, բայց Միացյալ Նահանգները շատ գումար է վաստակել»,- հայտարարել է ԱՄՆ նախագահը։
Թարգմանությունը՝ Էմմա Չոբանյանի
